Read Batak Angkola JOB 33 Bible Online

JOB 33 - Batak Angkola bible

JOB 33

¹Saonnari ale Job, tangkas jolo tangihon angka hata na giot dokkononkon.

²Madung rade au laho mandok hatangku.

³Sian ias ni rohangku do au mandok hata; na satutuna i do na giot dokkononniba.

⁴Madung ditompa Tondi Ni Debata au jana dilehen do dohot ngolungku.

⁵Jadi anggo tarbaen, alusi ma da au. Parade hian ma ampin-ampinmu.

⁶Anggo di Debata nada marimbar hita na dua rap sian tano liat do hita ditompa.

⁷Jadi ulang pola mabiar ho mida au; nada marmaksud anso talu ho baenonku.

⁸Antong madung hubege sanga aha na nidokmu, jana huastui do sanga aha na nimaksudmu.

⁹Didok ho, ‘Nada au mangalaosi. Nada adong au targora bope na mambaen sala.

¹⁰Hape Debata do mambaen-baen alasan laho mangalo iba, jana mambaen au gabe musuNa.

¹¹Dibaen Ia do rante di patku; jana sai dipamanat sude langka-langkangku.’

¹²O Job, pandapotmi na santak do salana! Angke gumodang do Debata ulang pado jolma.

¹³Biasi tuhasonmu Debata na so diterge Ia holos ni jolma?

¹⁴Haru pe mandok hata Debata marhite ragam ni dalanNa umpe sahalak na manangihon na nidokNa.

¹⁵Dompak modom pe halak manyinok di borngin na golap bulita di bagasan nipi bope parnidaan, mandok hata do Debata.

¹⁶Disuru Debata do halahi anso manangi di hataNa; disonggoti Ia halahi dohot hata gora-gora.

¹⁷Maksudna anso diantak halahi na mambaen dosa lalu manadingkon ginjang ni rohana.

¹⁸Nada dipadiar Ia halahi manondong hasegoan; diondihon Ia do halahi sian hamatean.

¹⁹Dipangkulingi Debata do halak marhite na parohon nyae lopus sap sude pamatangna i hansit mangae.

²⁰Na marnyae i nada lalusa be mangan, salangkan panganon na tumabo pe mambaen gialan.

²¹Maradu marniang pamatangnia, marbingkasan holi-holina i haidaan.

²²Saotik nari noma anso mulak ia tu inganan paradianan, jana donok-donok noma tusia inganan pananoman.

²³Betak adong do sahalak surusuruan ni Debata, sian na marribu-ribu i na paingotkon halak, salaho tu sibaenonna, na giot ro manolong ia.

²⁴Dokkonon ni surusuruan i ma sian ibo ni rohana, ‘Palua ma da ia, nada tola ia manuat dope tu tanoman. On ma hepeng panobusna, anso tola ia maruli haluaan.’

²⁵Tohong jana margogo ma pamatangna i marmiak songon doli-doli.

²⁶Muda martangiang ia, alusan ni Debata ma, marsomba ma ia tu Debata marmoga-moga jana pasuangon ni Debata ma pangalahona.

²⁷Jadi mandok hata ma ia di jolo ni halak na bahat, ‘Denggan do huetong na jahat, pardosa godang do anggo iba hape nada diuhumi Debata anggo iba.

²⁸Disundati Debata do au kehe tu hamatean i, gabe mangolu do au lopus tu saonnari.’

²⁹Marulak noli do i, dibaen Debata na songon i,

³⁰anso laing tarpalua Ia jolma lalu mangalehen hatuaan di ngoluna.

³¹Jadi tangihon ma jolo da Job, patinggil pinggolmu lalu pahohom, saonnari mandok hata jolo au.

³²Tapi betak adong sidohononmu, laing dok ma da; jana muda na tutu do ho, rela do au manjagitsa.

³³Tapi muda sala, pahohom ma antong jana tangihon, na giot mamodahon bisuk do tu ho.