Read Batak Angkola JOB 37 Bible Online

JOB 37 - Batak Angkola bible

JOB 37

¹Bade i ma mambaen taroktokku humitir dohot ate-ateniba gumadobur.

²Tangihon hamu sude ma da sora ni Debata, bege hamu ma ronggur na ruar sian pamanganNa.

³Tu langit i sudena, dipalua Ia hilapNia, ronggurNia ditongos Ia lalu tu angka ujung ni portibi.

⁴Dung i mangaronggur ma soraNia, sora na tongam sian ronggur; dohot di tonga-tonga ni sora na mambaen humutur, hilap na sumiksak marsisoroan.

⁵Tarjadi hahomangan, hara ni parenta ni Debata, angka pangalaho na so masuk di akal na so tarastui iba.

⁶Madabu do ambolas tu tano hara ni parentaNia; udan marsitutu madabu hara ni parsuruNia.

⁷Diantak Ia karejo ni jolma, anso diboto halahi na topet karejo Ia.

⁸Binatang harangan pe masuk tu lubang dohot liangna, jana ditadingkon asarna.

⁹Sian Selatan marroan alogo na sun gogo jana sian Utara alogo na ngali maradu manorus.

¹⁰Dipahimpal hosa ni Debata do sisik ni aek maradu bidang, paubahonsa gabe es na pir.

¹¹Diisi Ia aek tu bagasan ombun, dohot ombun na marsinondang digohi Ia ronggur.

¹²Marhabangan angka ombun tu sude tano on, patunda ni parenta ni Debata mardalan ma i sun ro di dia.

¹³Dilehen Debata do udan mambornohi tano i; sanga pe laho manguhum jolma i, bolas muse do i laho patidahonsa tu halahi, sanga songon dia hahohot ni holong ni rohaNia na so mantak i.

¹⁴Pahohom ma da jolo Job santongkin jana tangihon ma; parrohahon ma angka hahomangan ni Debata.

¹⁵Diboto ho dehe sanga songon dia pangalehen ni Debata angka tanda, patujolo ni hilap marsinondang sian ombun.

¹⁶Diboto ho dehe parhabang ni ombun i? I ma da hahomangan na ro sian hamaloan ni Debata i.

¹⁷Aha ma, hum na mangorongkon na milas do ho muda mamolus alogo Selatan di tano.

¹⁸Tolap ho ma pahembang parlangitan i songon Debata lalu papirkonsa songon bosi tuangan sanga kaco.

¹⁹Ajari ma hami salaho tu sidohononnami maradopkon Debata; nada adong na tarpajojor hami, rumar do pikirannami.

²⁰Nada ra anggo au mangido mangkobari dohot Debata ulang so i lalu dalanna diSia mambaen iba marmara.

²¹Saonnari songon i ma tajomna sinondang ni langit pasilo mata; dipasihar alogo i do ari marhite na mangombussa!

²²Muldop do sibalik hunik di Utara, jana hasangapan ni Debata mambaen homang rohanta.

²³Na godang ma da kuaso ni Debatanta, nada sanggup iba mandonohisa, markuaso jana tigor do Ia sapanjangna; na so jungada do dihapit hita jolma.

²⁴I ma da dalanna anso sude jolma pasangapkon Ia, jana sanga ise na mandok dirina marbisuk, nada be i diterge ia.”