Read Batak Angkola JOB 38 Bible Online

JOB 38 - Batak Angkola bible

JOB 38

¹Dung salpu i mangkuling ma TUHAN sian halingsungsung tu si Job, songon on:

²“Ise ma he ho umbaen na puluk mangkagangguhon habisuhonKi marhite hata na oto boti na rumar na nidokmi?

³Saonnari maradopan ma ho tu Au songon sada halaklahi jana angka sapa-sapangKon alusi.

⁴Na dung adong dehe ho di na Hujadihon portibi? Muda tutu do bagas na binotomu, paboa ma i!

⁵Ise dehe na manontuhon bidang ni portibi? Ise ma na patangging tali parsuhat ni i? Diboto ho dehe mangalusi?

⁶Bia dehe umbaen na togu parjongjong ni angka tiang panungkol ni portibi? Ise do lakna na mambaen hot batu ojahan ni portibi,

⁷di na rap marendei angka bintang andostorang dohot angka na nijadihon di banua ginjang marsurak marmoga sonang?

⁸Ise dehe na manutup pintu laho manambok laut bidang muda marbual aek i ruar sian butuha ni tano?

⁹Au ma da i na manggupgupi laut dohot ombun jana hagolapan ma manutup.

¹⁰Au do manontuhon batas ni angka laut jana Huambat ma i dohot pintu na margoruk.

¹¹Hudok ma tusi, ‘On do batasmu. Ulang salpui be! Mantak dison ma angka ombakmu na gogo pe.’

¹²O Job, unjung ma he disuru ho anso ro ari manyogot? Jana dibaen ho tingki gabe arian?

¹³Jungada ma he disuru ho anso bincar sidumadang ari tu portibi lalu paorotkon halak na jahat sian ingananna martabuni?

¹⁴Sinondang ni arian patidahon dolok dohot rura anso tangkas songon cap di tano liat jana songon pangalompitan ni baju jas.

¹⁵Matorangtu do sinondang ni arian anggo di halak na so marTuhan jana mangambat halahi patuluskon na mangasa hagogoan.

¹⁶Jungada dehe ho mijur tu mual ni laut, dao di pusotna i? Jungada dehe ho mardalan-dalan di tandolan ni laut i?

¹⁷Unjung dehe dipatuduhon halak tu ho horbangan di jolo ni hagolapan ni bulita di portibi hamatean?

¹⁸Taragak ho ma he sanga na tarsadia bidang ni portibi on? Muda diboto ho do i, alusi bo!

¹⁹Diboto ho dehe sanga na sian dia haroro ni hatiuran, dohot aha do satutuna mula ni hagolapan?

²⁰Tartontuhon ho ma he parbalohan ni na golap sian na torang? Sanga marsuru halahi mulak dung ro?

²¹Tontu malo do ho i, dibaen madung matobang ho jana di na manjadihon portibi on, madung adong hian ho!

²²Jungada dehe mangaligi inganan panyimpanan ni artangKu inganan ni ambolas dohot salju,

²³na Husimpan tu hatiha hasompitan, di masa ni porang dohot ari-ari ni paraloan?

²⁴Diboto ho dehe inganan parmulaan ni mataniari? Sanga sian dia asal ni alogo Habincaran?

²⁵Ise ma he na manghuar bondar di udan na por jana na mangalehen dalan tu ronggur dohot hilap?

²⁶Ise ma he na parohon udan tu tano na so diingani jolma?

²⁷Ise do na mandurus portibi na mahiang boti na marsingkor jabat martumbur ruput sudena?

²⁸Adong ma he ama parsinuan ni udan? Ise ma he amang ni aek ni ombun?

²⁹Adong dehe inang ni aek ni es? Ise do na manubuhon ombun na himpal?

³⁰Ise ma na manguba aek gabe batu, dohot na mambaen sisik ni laut gabe tonggong?

³¹Tarrahuti ho ma he bobohan ni bintang Hala sanga tarharkari ho ma he bobohan ni bintang Poriama?

³²Tartogu-togu ho ma he angka bintang di ganop musimna, dohot bintang Biduk na godang dohot na menek, tontuhononmu pardalanna?

³³Diboto ho ma he angka undang-undang di langit i? jana tardalankon ho ma he i di portibi?

³⁴Tarbaen ho ma he marsurak mamarenta ombun, lalu marsurusa mambaen banjir di ho marhite udan?

³⁵Jana muda disuru ho angka porkas maradu sumiksak, ro ma he halahi mandok, ‘Dison do au tuan!’?

³⁶Sian ise diboto unggas ibis[11] sanga andigan hatihana banjir Batang aek Nil? Ise paboahon tu manuk jambe na giot ro udan?

³⁷Ise ma he na tuk malo mangetong ombun jana na pabalikkonsa gabe mijur udan,

³⁸udan na mamohul abuan gabe marhimpalan dohot tano pe gabe marlohot-lohotan?

³⁹Tarbaen ho ma he marburu soroan di angka singa lalu tu na pabutongkon butuha ni angka anakna,

⁴⁰dompak maradian halahi di bagasan liangna sanga pe manggompang di bagasan asarna?

⁴¹Ise do na mangurupi unggas sigak na malean jana na pahae-pahulu marsioban dalanna manjalahi panganonna? Ise muse dehe na manolong muda pio-pio tu Au angka anakna mangido sipanganon?