Read Batak Angkola JOB 39 Bible Online

JOB 39 - Batak Angkola bible

JOB 39

¹Diboto ho dehe sanga na andigan bedu ditompa? Jungada do dipamanat ho ursa harangan di na manubuhon anakna?

²Diboto ho dehe sanga sadia honok i marlambe? Taretong ho dehe hatihana anso tubu anakna?

³Diboto ho dehe sanga andigan halahi mangodon pamatangna, lalu manubuhon angka anakna?

⁴Simbur do magodang angka anakna jana mur margogo di padang na bidang; markehean halahi nada mulak be tu inangna.

⁵Ise dehe na paluahon halode riar di harangan? Ise mangharhari talina lalu padiarkonsa marriaran?

⁶Hulehen halongonan gabe songon bagasna dohot angka padang na marsira gabe ingananna.

⁷Mandao do i sian kota dohot hariburan, nada adong tarbaen pajinakkon dohot markasayahon gogona.

⁸Padang na di dolok do inganan ni panganonna, dijalahi do disi suan-suanan simarata.

⁹Ra ma he lakna lombu riar markarejo tu ho? Ra ma he i marborngin di bagasan bara na di ho?

¹⁰Tartambat ho ma i mamaksa mamangkur di ho? Tarsuru ho ma he i mangaluku ladang na di ho?

¹¹Tarpangasahon ho ma he gogona na sumurung i, jana pasahatonmu tusia karejomu na borat i?

¹²Tarpasahat ho ma he tusia pos ni roha palagutkon suha ni sabamu, lalu marobansa tu pardegeanmu?

¹³Na hipas ma da pamerpem ni habong ni unggas unto! Hape anggo habang nada taralosa unggas bango.

¹⁴Marpira di tano unggas unto, lalu ditadingkon ia; gabe horsik i noma na mambaen las pirania.

¹⁵Nada be diboto-boto ia betak na tardege i dibaen jolma, sanga angka binatang na deba mangaloncasa.

¹⁶Anggo parbuatannia idaon songon na so ia do nampuna pira; nada i mahua disia, muda pe gabe na soada karejonia.

¹⁷Au do da na mambaen ia bodo boti bintot, nada Hulehen tusia bisuk dohot utok-utok.

¹⁸Tapi muda mamungka ia marlojong hipas, talu do baenonnia kudo dohot na manenggetsa.

¹⁹O Job, ho dehe na mangalehen gogo tu kudo dohot jambulan na mebang-ebang di tangkuhukna?

²⁰Ho dehe lakna na marsurusa mangalumpat songon siapor, jana mambiar-biari halak dohot hosana na marlongos.

²¹Jop do rohana mangkais-hais tano di rura, diroro ia do angka musu di parporangan sagogonia.

²²Nada adong dibotosa biar dohot heput; nada adong podang na mambaen ia sumurut.

²³Sinjata na nioban ni na manunggang paturatak jana marlinang hona sinondang.

²⁴Marsitutu marsiburju do kudo i marlojong; muda mangkuling sarune nada be dirina tarorom.

²⁵Marngiho-ngiho ma ia ganop tarbege sora ni sarune taranggo uap ma dihilala ia porang sian na dao dope; dibege ia ma panggora ni angka perwira di na mangalehen angka tanda.

²⁶Ho dehe mangajari halihi habang muda kehe ia tu Selatan marhabong na mangirbang?

²⁷Parentamu dehe na nioban ni unggas rajawali dompak so dipungka ia manaru asar di dolok na timbo i?

²⁸Di ambubu ni dolok batu dipature ia asarnia; angka ujung ni batu na pincur do gabe bentengnia.

²⁹Sian i ma dijago ia tu sasudena manajom matania manjalahi soroanna.

³⁰Marlagut ma angka rajawali humaliang soroanna angka rajawali na poso ma manginum mudarna.