Read Batak Angkola JOB 4 Bible Online

JOB 4 - Batak Angkola bible

JOB 4

¹“Job, manyosal dehe ho muda hudok hata? Nada tarpahohom au be, nada tarpalolot be sai manghohom iba.

³Bahat do halak na niajaranmu, jana dipargogoi ho do angka na magaletu.

⁴Angka hata na nidokmu papir roha, manogu halak na tinggang, na gale dohot na loja.

⁵Hape saonnari ho ma didondoni susa, tarsonggot ho jana nada lobas mangadopisa.

⁶Nada he marsomba tu Debata ho? Nada he na so hasurahan ngolumu? Anggo songon i, na patut do, muda marpos ni roha jana marroha na togu.

⁷Pikir ma jolo, sanga jungada halak na so marsala ditompu mara dohot susa?

⁸Huboto sian alatan na mamangkur ladang hajahatan, jana na manyabur hamagoan songon same ni suan-suanan, laing na manyabi do di parmaraan dohot di hasusaan!

⁹‘Songon haba-haba na gogo i do Debata; mangabisi halahi lopus soada!’

¹⁰Marngaur marauang do parjahat, songon singa halahi mangalumpat. Hape Debata mambaen halahi mangkohom jana mambaen iponna mangkalobang.

¹¹Marmatean halahi songon singa na so dapot mangan, lopus sude angka anakna marsarsaran.

¹²Jungada hujagit barita, songon hata husip di pinggolniba.

¹³Mangganggu modom lalu marjonggor, songon nipi na sambor di borngin na holom.

¹⁴Tarsonggot iba jana humitir mabiar, pamatang i manghutur lalu humitir.

¹⁵Alogo na lambok mangombus bohi, gabe marsijongjong imbulu ni tangkuhukku.

¹⁶Jongjong sada halak di jolongku, hutatap, hape na so sitandaanku. Bulus hutangihon ma sorana, paago longang ni na masa,

¹⁷‘Tarbaen ma he jolma na so sala anggo di adopan ni Debata? Tarbaen ma he na so martihas ia di mata ni na manompasa?

¹⁸Salangkan angka naposo ni Debata di banua ginjang, so na haposan i diSia. Di angka surusuruanNia pe, tardapot Ia do marsala jana na lipe.

¹⁹Mur ma hape mahluk na sian tano liat na sian orbuk na songon tande-tande do tarpisat!

²⁰Mangolu ma i di manyogotna, mate marampar ma i andospotangna.

²¹Gabe mago ma sude sinadonganna; mate muse ma i so dapotan roha na bisuk.’