Read Batak Angkola JOB 41 Bible Online

JOB 41 - Batak Angkola bible

JOB 41

¹Tartangkup ho ma he buaya Lewiatan, hum mamake sada hail ni ihan? Tartambat ho ma he dilana mamake angka tali panambat na somal?

²Tarharihiri ho ma he igungna dohot tali sanga pe tu ngadolna saitan bosi?

³Mungkin ma he ra ia mangido anso dipalua ho? Sanga martahi tu ho, mangido ibo ni roha sian ho?

⁴Ra ma he ia mambaen janji tu ho, jana marjanji ia sai mangoloi ho?

⁵Mungkin ma he tambatonmu ia songon unggas piaroan, na pajopkon roha ni angka dadaboru na poso?

⁶Mungkin ma he ia di angka parlaut gabe jagalan jana dibagi-bagihon di tonga-tonga ni parboniagaan?

⁷Tarsusuk ho ma he bobakna dohot tombak simata tolu sanga dangguranmu dohot hujur manombuk ulu?

⁸Goit ma jolo ia sanoli, lalu do nada haulahan ho be i sanoli nari; nada tarhalupahon ho be salolot-lolotna parsiranggutan i.

⁹Sanga ise halak na marnida Lewiatan, gale noma i lalu pangsan.

¹⁰Mangganas do i muda nisunggul sian podomanna; sahalak pe nada adong puluk mangadopisa.

¹¹Ise ma na mangalosa na so hona mara? Sahalak pe nada adong tarbaensa di tano on sudena.

¹²Antong Huturihon ma jolo taringot tu pat ni Lewiatan, salaho tu gogona dohot tompa ni pamatangna.

¹³Sahalak pe nada adong tarbaen manyibakkon bajuna sanga pe manombak baju porang na nipakenia.

¹⁴Ise ma he na tolap pangangang muncungnia na gogo i, na marisi angka ipon na jorbut i?

¹⁵Tanggurungna i sai songon parsusun ni parince rapet maradu togu, pirna songon batu.

¹⁶Marsidondonan damos marsiranggingan, salangkan alogo pe nada tarbaen marmasuhan.

¹⁷Songon i ma toguna parince i marsitiop-tiopan jadi nada i tarbaen martaldusan.

¹⁸Muda barsi Lewiatan, mamincar ma angka sinondang; matana marsilo-silo songon parbincar ni mataniari.

¹⁹Ruar ma dila ni api sian babana; marpincaran gurasa ni api sap sudena.

²⁰Marbual timus sian bagasan igungna songon timus ni hayu na nitutung di toru ni huali.

²¹Hosania mambaen banggar mur magara; api na gara ruar sian babania.

²²Tangkuhukna, i noma gogona, gabe sude mabiar di jolonia.

²³Umpe saotik na gale-gale di bobakna; nada ra i mabola harana songon pir ni baja.

²⁴Rohania pe songon pir ni batu, nada jungada ganggu, pir jana togu songon batu panggilingan.

²⁵Muda jabat jongjong ia, manigor raion ma na gogo, hara ni santakna biar ni rohana gabe so margogo.

²⁶Nada adong podang na tarbaen mambugangi ia; tombak, pana sanga hujur pe nada tarparhancitisa ia.

²⁷Anggo bosi, songon ruput do hilalaonna jana tumbaga songon dayuk ni hayu na burburon.

²⁸Nada adong pana na tarbaen paorotkon ia; songon durame do batu nanidanggurkon tusia.

²⁹Ora-ora dietong ia do i songon ruput; martata-tata do ia muda didanggurkon halak hujur.

³⁰Sisik na di butuhana i songon ngarngar na pincur. Songon kareta pardege, dihuar ia bustak lalu dibolasa torus.

³¹Digaor ia laut i lopus songon aek na gurgur, dibaen ia songon hudon pangalompaan ni miak na topet gurgur.

³²Indege ni patnia martadingan marsinondang, diuba ia laut gabe gubo na mamontar.

³³Nada adong tudosanna di tano on; mahluk na so umboto biar do on!

³⁴Salangkan binatang na gumarang pe bile do diidasa; sian sandok binatang harangan, ia ma da rajana.”