Read Batak Angkola JOB 7 Bible Online

JOB 7 - Batak Angkola bible

JOB 7

¹Songon ngolu ni tentara do da ngolu ni jolma, dokdok, sorat songon hatoban di ngoluna,

²songon hatoban manghalungunkon pangondianna, songon pangomo na intean di na niomona.

³Sian bulan tu bulan do ngoluniba na so martujuan; sian borngin tu borngin do rohangku digohi hamarsahan.

⁴Muda kehe au tu podoman, borngin maradu ginjang; rohangku sai tu mataniari bincar, nada tarbaen modom sonang.

⁵Gok binga pamatangniba dohot mudar na markorak; kulitku mangkaluak jana mangkaruari nana.

⁶Ngoluniba na so mararop roha on maradu tibu tu ujungna, humipas sian sorka na niordong ni partonunna.

⁷Ingot ma, hum sangombus sordam do ngoluniba; simanolongku nada bisa be mangaligi na denggan.

⁸Saonnari ro halak mangaligi iba — tapi hum santongkin noma da. Muda dijalahi au muse, nada dumpangsa be.

⁹Songon ombun na mangholom, lalu kehe, jolma pe mate, nada ra mulak be. Sude halak na manandasa, lupa ma tusia jana nada be niingot ia.

¹¹Hara ni i nada tarhasipkon au! Na gilap dohot na paet nada tarpompom au. Angkon mungkap pamanganniba jana niusehon na di roha.

¹²Biasi ma he au on angkon sai torus mataan jana jagoanMu? Adong he lakna naga padoha parmaraan au?

¹³Huuji do hupapayak-payak laho palua loja. Manjalahi numayang nian roha na susa.

¹⁴Hape dipabiar-biar Ho au dohot nipi; dipaso Ho angan-angan dohot sambor ni nipi,

¹⁵jabat umpor rohangku dipingkok mate pado mangolu marhancit badan simanare.

¹⁶Loja iba, ngongolan di ngolu, gumonan iba mate! Padiar ma au, angke ngoluniba soada diterge.

¹⁷Biasi he songon i di Ho porluna jolma? Biasi sai parrohahononMu pambaenanna?

¹⁸Disihiri Ho ma i ganop manyogot jana diuji Ho ia sai sosot.

¹⁹Andigan dope marbalik Ho sian au, anso sanga jolo hubondut ijurku?

²⁰O, ale panjagongku, rugi ma he Ho hara ni dosangku? Biasi ma he pakeonMu au gabe hahonaan ni porangMu? Sadia dokdok lakna soratMu patundangku?

²¹Na so tarampuni Ho be he dosangku? Na so tarbaen sesaonMu be lakna salangku? Santongkin nari mambustang noma da au di kuburan, jana muda dijalahi Ho au, nada adong be sidumpangan.”