Read Batak Angkola JOB 9 Bible Online

JOB 9 - Batak Angkola bible

JOB 9

¹“Huboto ma da na so sala na nidokmu. Tapi patut ma he jolma marsoal jana monang mangalo Debata?

³Sian saribu sapa-sapa ni Debata, sangkibung pe nada haalusan jolma.

⁴Sun do daulat ni Debata dohot kuasoNa; ise ma he na tahan mangalosa?

⁵Dipaimbar Debata do dolok so pamotoan ni jolma, dipartunggalingkon Ia dohot muruk ni rimasNa.

⁶Dibaen Ia lalo lopus gumuncang portibi, jana marambalangan ma panungkol ni tano i.

⁷Tarorai Debata do ulang bincar mataniari manyogot, dohot mangantahi angka bintang marsinondang di borngin na robot.

⁸Dipahembang Ia do da parlangitan, urupanmu so pola. Dilonca-lonca Ia tanggurung ni naga padoha.[3]

⁹Dibaen Ia baris-baris ni bintang Selatan di langit an, songon i bintang Poriama, bintang Sidongdong, bintang Hala.

¹⁰Nada haastuan iba sude pambaenanNa nada tarrajum angka hahomanganNia.

¹¹Mamolus Ia di jolongku, hape nada huida; mamolus Ia sian lambungku, hape nada tangkas diiba.

¹²Muda mangarampasi Ia, ise ma he na puluk mangararang Ia? sanga na barani marsapa, ‘Na mambaen bia do Ho?’

¹³Nada diolani Debata rimasNa dohot gurgur ni ate-ateNa. Angka na mangurupi si Rahab[4] pe tunduk do tuSia.

¹⁴Jadi, bia ma he baenonniba mangalo Ia? Hata na dia ma baenonniba mangalusi Ia?

¹⁵Haru pe iba na so marsala, aha ma he geldokniba, asing sian na mangido ibo ni roha sian Debata, panguhumniba?

¹⁶Sugari mangalusi Ia muda pio-pio iba, ganggu do au, tutu do Ia ulaning ro mangalusi iba?

¹⁷Digopu Ia do di bagasan halingsungsung, jana tambaanNia pardangolan so ada dalan.

¹⁸Umpe jabat humosa iba hum sangombas. Mur marrongoman dibaenSa tu iba hapaetan.

¹⁹Angkon maradu gogo noma iba ulaning dohot Ia? Hape ligi da, na santak do hinagogoNa. Sugari hubaen salaho tuSia pangaduan, ise ma na puluk mamiohon Ia tu paruhuman?

²⁰Burju do au jana nada mambaen dosa, hape pamanganku songon na mandok hata suhar-suharna. Sandok hata na nipajojor ni bibirku, sai songon na pasalahon diringku.

²¹Nada sala au tapi nada parduli au. Loja au na mangolu i. So adong be na porlu di au. Na sala dohot na tigor, sarupa be do bagianna: Dua-duana i rap sipusaon ni Debata.

²³Muda mate tompu halak na so marsala, martata do Debata pakia-pakiahon ia.

²⁴Dipasahat Debata do portibi on tu na dongki, jana mapitung angka panguhum sude dipambaeni. Debata do mambaen sudena i, ise dope he i, anggo so Ia?

²⁵Tibu do angka ari-aringku marsalpuan, lalu lintop soada hasonangan.

²⁶Songon parau na manjurur, manigor salpu ngoluniba, sahipas ni halihi na manungki, na manyoro soroanna.

²⁷Muda mikim au jana gonggong marjop ni roha, muda huuji manghalupahon sandok susa, gabe sai ro do mulak arsakku mangkojar di pudingku. Angke huboto do, sai na matua disalahon Debata do au.

²⁹Antong anggo songon i do, pardulingku dope au?

³⁰Sabun aha dope tarbaen mangagohon dosangku?

³¹Dipabonom Debata do tu na hodar, iba, salangkan pakeanku pe dohot do mangetong sihagigian iba.

³²Sugari jolma Debata, tarbaen au do maralus tuSia. Jadi kehe ma hami mangadop tu pangadilan laho paujungkon sandok partangkangan.

³³Hape soada panongai di antaranami na tarbaen manimbang parkaronami.

³⁴Sai mantak ma nian Debata manguhum iba jana dipadao ma sian iba hasogironNa!

³⁵Nada mabiar au tuSia jana songon on au giot manghobari, angke hutanda do rohangku sandiri.