Read Batak Angkola MASMUR 10 Bible Online

MASMUR 10 - Batak Angkola bible

MASMUR 10

¹Biasi songon i daoMu o TUHAN, jana martabuni Ho taran hami di hasusaan?

²Mardongan jungkat halak na jahat i mamparkanciti na dangol; padiar ma hara ni hajahatanna gabe halahi manaon.

³Halak na jahat manghatahon na nihalungunkon ni rohana, halak na lahap mamurai jana manulak TUHAN.

⁴Nada parduli tu TUHAN anggo halak pardosa; hara ni jungkatna, dipikiri ia nada adong Debata.

⁵Halak na jahat marlabo do sian sude karejona; nada diastui ia Tona Ni TUHAN, jana dipalayas ia sude alona.

⁶Ning rohania di bagasan, “Karejongku nada adong sundatna, nada hona mara salolotna.”

⁷Mamurai ia jana mangondam, sude hatania gok hagigian dohot hajahatan.

⁸Martabuni ia di angka huta giot mamunu halak na so marsala. Songon singa paintehon di balik ni ramba na poso, mangaligi-ligi halak na so margogo. Diolat ia halak na dangol di inganan na buni, ditangkup lalu disarat ia sian i.

¹⁰Dung i madabu ma na so margogo i lalu mate, pambaen ni hagogoon ni halak parlate.

¹¹Ning rohania, “Debata madung lupa, nada diparrohahon ia; jana nada idaonNia ro di salolotna.”

¹²Jongjong ma Ho TUHAN, uhumi ma halak parjahat, ulang halupahon halak na marsak.

¹³Biasi torus dilayasi halak na jahat i Debata, jana marpikir, nada ra Debata manguhumna?

¹⁴Tapi ale Debata diida Ho do parkancitannami, jana tontu do tolonganMu hami. Halak na so margogo pasahatkon tu Ho dirina sudena, Ho do na mangurupi na so marama so marina.

¹⁵Ponggolkon ma hakuasoon ni halak na jahat marroha, uhumi hajahatanna i anso jora.

¹⁶TUHAN do raja ro di salolotna; angka bangso na so mananda Ia angkon mago sian tano na nilehenNia.

¹⁷TUHAN, ditangihon Ho do tangiang ni halak na bile, jana dipagodang Ho do roha ni halahi be.

¹⁸Ho do na manangihon jana mangurupi na so marama jana na diparkanciti, ulang adong be jolma di portibi na puluk manjahati tu halahi.