Read Batak Angkola MASMUR 102 Bible Online

MASMUR 102 - Batak Angkola bible

MASMUR 102

¹Tangiang ni sada halak na di bagasan hasusaan, humolos ia tu TUHAN. Ale TUHAN, tangihon ma tangiangku, parrohahon ma pangidoanku.

²Ulang marbalik Ho sian au muda di bagasan hasusaan au. Tangihon ma muda pio-pio au, manigor ma alusi au.

³Salpu do ngolungku songon timus, milas songon na hona purun holi-holingku.

⁴Hona pukul ate-atengku songon duhut na hiang, nada lalu au be mangan.

⁵Mangangguki au marngiar, hum tinggal bobak lohot di holi-holi noma pamatangku.

⁶Tudos ma au tu unggas rande di parhorsihan, songon sipauk di sego-sego ni huta na mamolngit.

⁷Nada tarpodom mataniba, songon unggas na lungunan di bungkulan ni bagas.

⁸Sasadari au sai diincaki musu, dibaen halahi songon na niburaan goarku.

⁹Hupapangani abuan songon roti, inumonku pe marcampur ilu.

¹⁰Muruk jana rimas Ho, ale Tuhan, gabe diangkat Ho au jana disampakkon Ho.

¹¹Salpu ngolungki songon halinu borngin, malos ma au songon duhut.

¹²Tapi raja do Ho sapanjangna, ale TUHAN, sai ingoton marsundut-sundut.

¹³Giot jongjong do Ho jana manghaholongi Sion, madung dapot hatihana maribo roha Ho tusia.

¹⁴Dibaen holong do roha ni angka naposoMu midasa, haru pe madung tinggal sego-sego sajo noma i. Ibo roha ni halahi midasa, haru pe ia madung gabe abu.

¹⁵Dihabiari angka bangso noma TUHAN, sandok raja manghabiari kuasoNia,

¹⁶muda bangunon ni TUHAN ma Sion mangulaki, jana muda ro Ia di bagasan hatongamonNia.

¹⁷TangihononNia ma tangiang ni bangsoNa na marhasusaan i, jana nada tulakonNia pangidoan ni halahi.

¹⁸Suratkon ma sude na nibaen ni TUHAN, baen di sundut na ro di pudi, anso bolas Ia pujion ni bangso na so tubu dope tu portibi on.

¹⁹Manatap do TUHAN sian ingananNia na timbo, sian banua ginjang Ia manatap tu tano on,

²⁰giot manangihon holos ni halak tahanan dohot paluahon jolma na niuhum tu hamatean.

²¹Gabe baritahonon ma goarNia di Sion, di Jerusalem goarNia papuji-pujion,

²²di na marlagut angka bangso dohot angka harajaan laho marsomba tu jolo ni TUHAN.

²³Dibuat TUHAN gogongku dompak di haposoonku, madung dipapendek Ia umurku.

²⁴Jadi ningku do, “Ale Debata, ulang buat hosangku dompak di hajegesan ni goarku.” Salolot-lolotna do Ho mangolu, ale TUHAN,

²⁵narobi ni narobi dijadihon Ho hasiangan; jana dohot tanganMu sandiri dibaen Ho rupa ni langit i.

²⁶Sude do i angkon mago, hum Ho do na sai hot; songon pakean sude do angkon mumut songon baju na buruk ambungkononMu noma i, gabe mago ma sudena i.

²⁷Tapi anggo Ho laing hot do tongtong nada maruba, manongtong do ngoluMu nada marhaujungan.

²⁸Sonang so haribo-riboan ma ngolu ni angka dakdanak ni naposoMon, jana anak dohot pahompu ni halahi sai tongtong adong di adopanMu.