Read Batak Angkola MASMUR 103 Bible Online

MASMUR 103 - Batak Angkola bible

MASMUR 103

¹Sian si Daud. Puji ma TUHAN, ale tondingku jana sude rohangku mamuji goarNa na badia i.

²Puji ma TUHAN, ale tondingku, jana ulang halupahon sude hadenggananNa!

³Disesa Ia do sude dosamu, jana dipamalum sude nyaemu.

⁴Dipalua Ia do ngolumu sian kuburan, dipasupasu Ia ho marhite holong dohot asi ni rohana.

⁵Marhasurungan do ngolumu dibaen Ia marhite hadengganan, songon rajawali laing poso ho jana marhagogoan.

⁶Didalankon TUHAN uhum dohot hatigoran tu sude halak na didondonan.

⁷Dipatandahon Ia do angka dalanNia tu si Musa, dohot angka pambaenanNa tu bangso Israel.

⁸Parasiroha jana pardenggan basa do TUHAN, lambat tarrimas jana parasiroha godang.

⁹Santongkin sajo do hamumuruk ni Tuhan, nada sapanjangna rimas ni rohaNia.

¹⁰Nada dibaen tu hita hombar tu angka dosanta, jana nada dibaloskon tu hita hombar tu angka hajahatanta.

¹¹Tapi songon gincat ni langit di ginjang tano on, songon i ma godang ni holong ni rohaNia di halak na hot porsaya.

¹²Songon dao ni Habincaran tu Hasundutan sai ma daona diambungkon Ia dosanta.

¹³Songon asi ni roha ni ama-ama mida angka anakna do, asi ni roha ni TUHAN di angka na manghabiari Ia.

¹⁴Angke diboto Tuhan do asal mulanta, diingot Ia do hum abuan sajo do hita.

¹⁵Songon duhut, nada sadia honok ngolu ni jolma, marbunga ma ia songon bunga di ladang;

¹⁶muda diombus alogo, manigor mago ma ia, nada adong be marnidasa mangulaki.

¹⁷Tapi laing holong do roha ni TUHAN mida na sai porsaya, marsundut-sundut do mardalan hadenggananNa,

¹⁸di halak na marsitiopan tu parjanjianNa, dohot na marsitutu mangoloi parentaNa.

¹⁹Mamarenta do TUHAN di banua ginjang, Ia do raja na mamarenta sasudena.

²⁰Puji ma TUHAN, hamu ale angka surusuruan na marsahala, na manangihon dohot na mangoloi parentaNa.

²¹Puji ma TUHAN, hamu sude angka na markuaso di banua ginjang, sude naposoNia na mandalankon hagiotNia.

²²Puji ma TUHAN, hamu ale angka na nitompaNia, di sude harajaanNia. Puji ma TUHAN, ale tondingku!