Read Batak Angkola MASMUR 105 Bible Online

MASMUR 105 - Batak Angkola bible

MASMUR 105

¹Mandok tarimakasi ma di TUHAN, paboa-boa hamu ma hagodanganNia. Caritohon hamu ma pambaenanNia di tonga-tonga ni angka bangso.

²Endehon ma puji-pujian di TUHAN, baritahon hamu ma sandok hahomangan na nibaenNia.

³Marjop ni roha ma hita, angke Ia do nampuna hita, sai marjop ni roha ma sude na marsomba tuSia.

⁴Ro ma tu TUHAN mangido pangurupion, marsomba ma tuSia ulang marnamantak.

⁵O ale pomparan ni si Abraham, naposo ni Debata dohot pomparan ni si Jakob, bangso na nipiliNia, ingot hamu ma sude hahomangan na nibaenNia, ulang halupahon hamu angka uhum ni Debata.

⁷Ia do TUHAN, Debatanta, marlaku do uhumNia di sandok tano on.

⁸IngotonNia do tongtong parjanjianNia, marlaku do janjiNia lopus saribu sundut.

⁹IngotonNia do janjiNia dohot si Abraham, nada halupahononNia janjiNia na tu si Ishak.

¹⁰Dirasmihon do parjanjian i tu si Jakob, gabe hatontuan di Israel sapanjangna.

¹¹Ning Ia do, “LehenonKu ma di ho tano Kanaan baen tean-teanan.”

¹²Anggo na jolo songon halak sileban do ngolu ni bangso ni Debata disi, bilangan ni halahi pe saotik.

¹³Mimbar-imbar do halahi sian bangso na sada tu na sada nari, bungkas sian luat na sada tu luat na asing.

¹⁴Nada dipaloas TUHAN sanga ise pe manyosak halahi; digorahon Ia angka raja laho mangondingi halahi.

¹⁵“Ulang ganggu hamu bangso pilianKu, ulang hahua hamu angka panurirangKu!”

¹⁶Dipadondonkon TUHAN tu luat ni halahi haleon, jana dibuat sian halahi sude simpanan ni panganon.

¹⁷Tapi disuru Ia sahalak manjoloani halahi, si Josep, na targadis songon hatoban.

¹⁸Mardalan ia marrante patna i, tolonannia ditambat dohot rante bosi.

¹⁹Ujungna tarjadi ma alatan na nidoknia, marbukti do bonar ia, didok hata ni TUHAN.

²⁰Jadi dipalua ia sian hurungan dipalua raja ni Mesir, parkuaso ni angka bangso.

²¹Dipasahat ma tusia karejo manghobasi bagas godang, jana dilehen kuaso di sude artana.

²²Roha-rohania noma mangatur angka menteri, na tobang-tobang pe disipaingoti.

²³Jadi kehe ma si Jakob tu Mesir jana maringanan ma ia di luat i songon halak sileban.

²⁴Dilehen TUHAN hagabean di bangsoNa, gabe gumogo halahi sian alona.

²⁵Dibaen Ia halak Mesir margoyak ni roha mida bangsoNia, jana mambaen akal busuk tu angka naposoNia.

²⁶Dung i diutus Ia ma si Musa, naposoNa, dohot si Harun, halak na nitodoNia.

²⁷Dipatupa halahi di Mesir hahomangan, angka pambaenan na godang sian Tuhan.

²⁸Dipamasa Tuhan di luat i golap marimpot-impot, hape dialo bangso Mesir do parentaNia.

²⁹Diuba Ia batang aek ni halahi gabe mudar, gabe pusa sude gulaenna.

³⁰Mangamburi angka tohuk di luat ni halahi, marmasukan bage lalu tu angka bilik ni rajana i.

³¹Hara ni parenta ni Debata marroan ma rongit dohot lanok, mangarongomi sude inganan.

³²Diduruskon Ia ambolas gonti ni udan, jana diparo Ia porkas marsisoroan.

³³Marumpak dibaen Ia bona ni anggur dohot ara mangkasopak sude suan-suananna.

³⁴Didabu Ia parenta, gabe marroan ma siapor, maradu bahat bilanganna jabat nada taretong.

³⁵Dijampali sude suan-suanan na di ladang, sude eme na disuan abis dipangan.

³⁶Dung i dibunu Ia sude anak siangkaan ni Mesir, gabe marobur ma angka anak ni bangso na diarop roha.

³⁷Dung i ditaruhon Ia ma bangso Israel ruar, sere dohot perak dohot dioban; horas torkis do sude jana marhagogoan, di bagasan gomgoman ni Tuhan.

³⁸Mabiar halak Mesir mida halahi, gabe marjop ni roha halak Mesir di na kehe halahi.

³⁹Dilinggomi Tuhan anakNia i marhite ombun; muda borngin, dilehen Ia di halahi api patorang dalan.

⁴⁰Mangido halahi gabe disuru Ia angka unggas marroan, dipangan halahi sipanganon banua ginjang lopus butongan.

⁴¹Dibola Ia dolok batu gabe mamincar aek, mardalan di parhorsihan songon batang aek.

⁴²Dibaen ingot do Tuhan di janjiNia na nibaenNa dohot si Abraham, naposoNia.

⁴³Jadi ditaruhon Ia bangsoNia mardongan jop ni roha, marendei halahi marsurak marmoga-moga.

⁴⁴Dilehen Ia di halahi tano ni angka bangso, suha ni haloloja ni halak gabe bangsoNia do nampunasa,

⁴⁵anso oloan ni halahi angka uhumNia jana ihutkononna parentaNia. Puji ma TUHAN!