Read Batak Angkola MASMUR 106 Bible Online

MASMUR 106 - Batak Angkola bible

MASMUR 106

¹Puji ma TUHAN! Mandok tarimakasi ma tu TUHAN, angke burju do Ia; hot do manongtong holong ni rohaNia.

²Ise do na tarbaen mamaritahon hagodangan ni pambaenanNia, dohot mangalehen puji-pujian na patut diSia?

³Martua ma sanga ise na mandalankon angka parentaNia, jana na sai tigor di angka tindakanna.

⁴Ingot ma au ale TUHAN, muda diurupi Ho bangsoMi, tolong ma au muda dipalua Ho halahi.

⁵Anso laing huida nian sonang halakMi, jana marjop ni roha au rap dohot bangsoMi. Anso laing bangga jana sonang rohangku dohot halak na gabe bangsoMu.

⁶Laing songon angka ompunami, hami pe madung mardosa, madung hami baen na jahat dohot na manggaga.

⁷Nada diastui ompunami di Mesir; hahomangan na nikarejohonMu nada diboto halahi. Lupa do halahi di holong ni rohaMu na godang i; di lambung ni Laut Rara dialo halahi do Na Gumincat i.

⁸Tapi hombar tu janjiMu, dipalua Ho do halahi, anso mur tangkas haidaan sahalaMi.

⁹Hara ni parentaMu, mahiang ma Laut Rara, dibolus bangsoMu laut i, songon na mardalan di tonga padang.

¹⁰Gabe malua ma halahi sian tangan ni musuna, sian tangan ni alona, halahi dipalua.

¹¹Dibonomkon aek alo i; umpe sahalak dipatola luncat.

¹²Gabe porsaya ma bangsoMu di janjiMi, jana marende di Ho mamuji.

¹³Hape tibu do ale TUHAN, dihalupahon halahi pambaenanMu; nada mangido sipaingot halahi, di angka tindakanna.

¹⁴Dirajai hagiotna halahi di padang halongonan, lopus diuji halahi di inganan i, Ho sandiri ale Debata.

¹⁵Jadi gabe dilehen Ho sanga aha na nipangidona, tapi laing dipaihut Ho muse do nyae na jorbut tu halahi sudena.

¹⁶Mangiburu do halahi di parhorsihan i maradopkon si Musa dohot si Harun naposoMu na badia i.

¹⁷Gabe dibondut tano si Datan, si Abiram dohot dongan sabagasna pe marbonoman.

¹⁸Mijur api manyoro dongan ni halahi, mangabiskon sandok na so ture i.

¹⁹Patung ni anak ni lombu sian sere di Sinai dibaen halahi, lalu marsomba halahi tu patung gana-ganaan i.

²⁰Ditulak halahi do Ho, Debata na godang, laho marsomba patung ni pahanan na manggagat duhut.

²¹Dihalupahon halahi do Debata na paluahon halahi, na dung patupahon angka pangalaho na godang di Mesir,

²²angka pambaenan na godang di Tano Ham, angka pangalaho hahomangan di Laut Rara.

²³Hara ni i gabe tubu di rohaMu laho mangabisi bangsoMi, tapi diambati si Musa, halak na nitodoMi. Ia gabe panonga-nongai di halahi gabe mombun antong rimasMi.

²⁴Gabe ditulak halahi do tano na jeges hara ni na so porsaya di janjiMu, ale Debata.

²⁵Marungut-ungut halahi di bagasan undung-undung nada ra be manangihon na nidokMu.

²⁶Gabe marjanji Ho mardongan sumpa, na mate di padang manyahatang i noma halahi.

²⁷Marserak noma pomparan ni halahi sun tu dia, jana marmatean di tonga-tonga ni bangso na marragam.

²⁸Di Peor, marsomba halahi tu Baal, jana dipangansa pelean ni angka debata.

²⁹Hara ni pangalaho i, ro ma murukMu, TUHAN, diparo Ho ma tu halahi nyae na jorbutan.

³⁰Tapi jongjong ma si Pinehas manguhumi parsala, gabe mantak ma antong disi bala.

³¹Nietong ma na nibaennia i gabe jasa na denggan, jana marsundut-sundut ma ia di halak gabe parningotan.

³²Di sumur Meriba muruk Ho dibaen halahi, gabe susa si Musa patunda ni parbuatan ni halahi i.

³³Mangampir pambaen ni halahi tu rohania, jadi gabe salpu tardokkon ia hata.

³⁴Nada diabiskon halahi angka bangso na asing, hombar tu na diparentahonMu humani.

³⁵Mur margaul muse dope halahi tu angka bangso i, adat ni halak na so mananda Debata, ditiru halahi.

³⁶Gabe marsomba ma bangsoMu tu gana-ganaan, jana i ma di halahi boncir ni hadabuan.

³⁷Angka dakdanak ni halahi sandiri pe dilehen gabe haul tu angka parbeguan sisombaon di Kanaan.

³⁸Dibunu halahi angka halak na so marsala, anak ni halahi sandiri i ma na giot dihaulkon tu debata ni Kanaan, hara ni pamunuon i gabe hodar ma tanona.

³⁹Pangalaho i ma mambaen hodar halahi; nada setia tu Debata halahi.

⁴⁰Muruk Ho dibaen bangsoMi, magigi Ho maradopkon halahi.

⁴¹Jadi gabe dipasahat Ho ma halahi tu angka bangso, dipadiar Ho noma halahi dirajai alo.

⁴²Jadi disosak musu i ma halahi, jana ditaluhon di toru ni kuasona.

⁴³Marpupu dipalua Ho halahi, tapi jumop do roha ni halahi manggagai gabe madabu ma halahi mur bonom tu bagasan dosa.

⁴⁴Tapi di na pio-pio halahi, laing ditangihon Ho do, diparrohahon Ho do hasusaan ni halahi, ale TUHAN.

⁴⁵Hara ni halahi diingot Ho parjanjianMu, jana diuba Ho haputusanMu, hara ni godang ni holong ni rohaMu.

⁴⁶Disosoi Ho roha ni sude alona, gabe maribo roha paida-idasa.

⁴⁷Palua ma hami, ale TUHAN Debatanami, sian tonga-tonga ni angka bangso i oban ma hami mangulaki anso tarbaen hami mandok tarimakasi dohot mamuji goarMu na tongam i.

⁴⁸Puji ma TUHAN, Debata ni Israel, saonnari dohot salolot-lolotna. Sude ma halak mandok, “Amen!” Puji ma TUHAN!