Read Batak Angkola MASMUR 112 Bible Online

MASMUR 112 - Batak Angkola bible

MASMUR 112

¹Puji ma TUHAN! Martua ma na burju na marjop ni roha patuluskon parenta ni TUHAN.

²Markuaso ma angka dakdanakna di luat i, dipasupasu ma angka pomparan ni na burju i.

³Makmur jana maradong ma di bagasna, marhasonangan ma ia sapanjangna.

⁴Marsinondang ma na torang di bagasan hagolapan, di halak na burju, na tigor, parholong dohot paribo.

⁵Martua ma halak na jop roha painjamkon jana na jujur di sude siuruson.

⁶Anggo halak na burju nada ganggu, salolot-lolotna do ia niingot.

⁷Nada mabiar ia manjagit barita na jat, porsaya do ia tu TUHAN jana togu rohana.

⁸Nada sak rohania, nada heput muse ia, angke pos do rohania, sai na talu do musunia.

⁹Dilehen ia do sidoka tu halak na pogos, jana dibagihon ia sinadonganna sian burju ni rohana; sai marpupu do ia mambaen na denggan, hara ni i ma umbaen na markuaso ia jana dipasangap.

¹⁰Diida halak na jahat ma i jana milas rohana, patungaripon halahi hara ni sogo ni rohana. Gabe mago ma halahi nada adong be arop ni roha sapanjangna di halahi.