Read Batak Angkola MASMUR 116 Bible Online

MASMUR 116 - Batak Angkola bible

MASMUR 116

¹Huhaholongi do TUHAN, dibaen ditangihon Ia do au, diparrohahon Ia pangidoanku.

²Ditangihon Ia do au, muda pio-pio au tuSia.

³Dirongomi parmaraan godang au, humasusa jana mabiar au pambaen ni jorbut ni hamatean.

⁴Gabe pio-pio au tu TUHAN, ningku, “Ale TUHAN, hupangido, palua ma au!”

⁵Na denggan do TUHAN i jana parasi roha; gok ibo ni roha do Debatanta.

⁶Diondingi TUHAN do halak na so margogo; ditolong Ia do au dompak di bagasan parmaraan au.

⁷Sonang ma ho, ale rohangku, angke burju do TUHAN tu au.

⁸Madung disalpuhon TUHAN sian au hamatean, diapoi Ia do au jana nada dipadiar Ia au marhataluan.

⁹Gabe tola ma au dohot mangarasoi ngolu di tano on, di bagasan pangalinggoMi ni TUHAN.

¹⁰Tongtong do au porsaya, haru pe hudok hata, “Sun do arsak ni rohangku,”

¹¹haru pe huambang di bagasan puntol ni pikiranku, “Sahalak pe nada adong haposan ni roha.”

¹²Songon dia ma he tarbaloskon au di Tuhan denggan ni basaNa, na binaenNia tu au?

¹³Obanonku ma anggur baen haul di TUHAN mandok tarimakasi hara ni pangurupiNa.

¹⁴Gohanku ma janjingku tu TUHAN, di jolo ni bangsoNia sudena.

¹⁵Arga do di roha ni TUHAN hamamate ni hasian ni rohaNia.

¹⁶NaposoMu do au on, ale TUHAN, laing songon dainang i, au pe, huoloi do Ho; madung dipalua Ho au sian hamatean.

¹⁷Obanonku ma haul tarimakasi tu Ho, lalu martangiang ma au tu Ho, ale TUHAN.

¹⁸Patulusonku ma janjingku tu TUHAN, di jolo ni bangsoNia sudena,

¹⁹na marlagut di alaman ni Bagas Ni TUHAN, di tonga-tonga ni kota Jerusalem. Puji ma TUHAN!