Read Batak Angkola MASMUR 118 Bible Online

MASMUR 118 - Batak Angkola bible

MASMUR 118

¹Dok ma tarimakasi tu TUHAN angke na denggan do Ia, sai hot do manongtong holong ni rohaNia.

²Dokkonon ni halak Israel ma sugari, “Holong ni rohaNia hot do tongtong.”

³Dokkonon ni angka malim ma sugari, “Holong ni rohaNia hot do tongtong.”

⁴Dokkonon ni sude halak na marsomba tuSia ma sugari, “Holong ni rohaNia hot do tongtong.”

⁵Di bagasan hasusaanku pio-pio au tu TUHAN; gabe dialusi Ia do au jana dipalua Ia.

⁶Nada mabiar au, angke didongani TUHAN do au, nada margogo anggo jolma maradopkon au.

⁷Mamihak tu au do TUHAN laho mangurupi au, idaonku ma martaluan angka musungku.

⁸Gumonan do iba marpos ni roha tu TUHAN, umpado mangasahon jolma.

⁹Gumonan do iba marpos ni roha tu TUHAN, umpado mangasahon na mora-mora.

¹⁰Bahat pe musu mangarongomi au, tapi mardongan kuaso ni TUHAN, halahi hutaluhon.

¹¹Dihobuk halahi do au humaliang, tapi mardongan kuaso ni TUHAN, halahi hutaluhon.

¹²Songon loba halahi mangarongomi au, tapi mardongan kuaso ni TUHAN, halahi hutaluhon. Songon sihupi na abis dipangan api, songon i muse ma musungku diabisi.

¹³Marsitutu do diserang au jana jabat do giot tinggang tapi diurupi TUHAN au.

¹⁴TUHAN do hagogoanku dohot na hupapuji-puji, madung dipalua Ia do au.

¹⁵Sora ni olop-olop dohot hatuaan marsaringar di undung-undung ni partigori. “Tangan siamun ni Tuhan mambaen hamonangan.

¹⁶Kuaso ni TUHAN mangalehen di hita hamonangan. Paltak kuaso ni TUHAN di bagasan parporangan!”

¹⁷Sai na mangolu do au, nada idaonku hamatean, laho mamaritahon karejo ni TUHAN.

¹⁸Borat do da tu au uhuman ni TUHAN, tapi nada jabat dipasahat Ia au tu hamatean.

¹⁹Buka ma angka pintu horbangan ni Bagas Ni TUHAN, anso masuk au jana mandokkon tarimakasi tu TUHAN.

²⁰On ma da, pintu horbangan ni TUHAN, hum halak na jujur do na tola masuk tusi.

²¹Hupuji do Ho TUHAN, dibaen madung dioloi Ho tangiangku; madung dilehen Ho hamonangan di au.

²²Batu na dung niambungkon ni tukang bangunan i, i ma na gabe batu parsuhi.

²³Na nipamasa ni TUHAN do i, hahomangan do i anggo di matanta.

²⁴Ari on do na nijadihon ni TUHAN, marolop-olop jana marjop ni roha ma hita disi.

²⁵Ale TUHAN, palua ma hami, ale TUHAN, lehen ma hamonangan di hami.

²⁶Dipasupasu ma ia na ro di bagasan goar ni TUHAN, hami pasupasu ma hamu sian Bagas Ni TUHAN.

²⁷TUHAN do Debata, madung ditorangi Ia, hita. Tambatkon ma haul pesta i dohot tali, tu tanduk-tanduk ni langgatan i.

²⁸Ho do Debatangku, mandok tarimakasi au tu Ho, Debatangku, hupagodang do Ho.

²⁹Dok ma tarimakasi tu TUHAN, angke denggan do Ia, hot do holong ni rohaNia salolot-lolotna.