Read Batak Angkola MASMUR 122 Bible Online

MASMUR 122 - Batak Angkola bible

MASMUR 122

¹Ende ni si Daud manopot Bagas Ni Tuhan. Jop do rohangku muda didokkon halak tu au, “Beta hita tu Bagas Ni TUHAN!”

²Saonnari madung masuk hami, mamolus sian horbangan ni kota Jerusalem.

³Jerusalem na nibangun mangulahi, marbanjar jeges jana taratur.

⁴Angka marga ni bangso, tuson ma marroan, angka marga pilian ni TUHAN, laho mandok tarimakasi tuSia songon na nidok ni parentaNia.

⁵Dison ma angka raja ni Israel manguhumi bangsoNa.

⁶Tangiangkon hamu ma hasonangan ni Jerusalem: “Anso sai sonang sude halak na manghaholongi ho.

⁷Sai dumpang ma dame di luatmu, dohot hademahon di bagasan angka tano batomu.”

⁸Hara ni angka koum dohot ale-alengku, hudok, “Sai horas torkis ma ho!”

⁹Hara ni Bagas Ni TUHAN Debatanta, hutangianghon do anso martua ho nian.