Read Batak Angkola MASMUR 126 Bible Online

MASMUR 126 - Batak Angkola bible

MASMUR 126

¹Ende manopot Bagas Ni Tuhan. Di na nioban ni TUHAN hita mulak tu Jerusalem, songon halak na marnipi do hita!

²Sai torus do hita martata jana marende marjop ni roha gabe jabat dipardokkoni angka bangso na asing, “Godang ma tutu na nipatupa ni TUHAN tu halahi!”

³Olo, tutu do i, bahat do na nipatupa ni TUHAN di hita, marjop ni roha ma hita!

⁴Oban ma hami mulak, ale TUHAN, tu tanonami, songon udan na mambaen tangkuju di batang aek na hiang di tano Negeb.

⁵Ise na manyabur mardongan arsak, manyabi ma ia marjop ni roha.

⁶Mardongan ilu ni matana, kehe ma ia manyabur same di ladangna. Mardongan ende jop ni roha mulak ma ia marobani angka sageanna.