Read Batak Angkola MASMUR 136 Bible Online

MASMUR 136 - Batak Angkola bible

MASMUR 136

¹Mandok tarimakasi ma hamu tu TUHAN, angke na denggan do Ia, hot do holong ni rohaNia sapanjangna.

²Dok ma tarimakasi tu Debata ni sandok debata, hot do holong ni rohaNia sapanjangna.

³Dok ma tarimakasi tu Tuhan ni sandok tuhan hot do holong ni rohaNia sapanjangna.

⁴Hum Ia do na mambaen angka hahomangan godang, hot do holong ni rohaNia sapanjangna.

⁵Marhite hamaloanNia, dijadihon Ia langit, hot do holong ni rohaNia sapanjangna.

⁶Dipahembang Ia tano on di ginjang ni aek, hot do holong ni rohaNia sapanjangna.

⁷Dibaen Ia angka panorangi di langit, hot do holong ni rohaNia sapanjangna;

⁸mataniari laho mangarajai arian, hot do holong ni rohaNia sapanjangna;

⁹bulan dohot bintang laho mangarajai borngin, hot do holong ni rohaNia sapanjangna.

¹⁰Dibunu Ia angka anak siangkaan ni Mesir, hot do holong ni rohaNia sapanjangna.

¹¹Dioban Ia Israel ruar sian Mesir, hot do holong ni rohaNia sapanjangna;

¹²marhite tangan na gogo jana na marsahala, hot do holong ni rohaNia sapanjangna.

¹³Dibola Ia Laut Rara, hot do holong ni rohaNia sapanjangna;

¹⁴dioban Ia bangsoNia taripar laut, hot do holong ni rohaNia sapanjangna.

¹⁵Hape anggo raja ni Mesir dohot paranganna dibonom Ia, hot do holong ni rohaNia sapanjangna.

¹⁶Diuluhon Ia bangsoNia mamolus parhorsihan, hot do holong ni rohaNia sapanjangna.

¹⁷Ditaluhon Ia angka raja na sangap-sangap, hot do holong ni rohaNia sapanjangna;

¹⁸dibunu Ia angka raja-raja na tarbarita, hot do holong ni rohaNia sapanjangna.

¹⁹Si Sihon raja ni halak Amori hot do holong ni rohaNia sapanjangna;

²⁰si Og raja ni halak Basan, hot do holong ni rohaNia sapanjangna.

²¹Dilehen Ia luat ni halahi di bangsoNia, hot do holong ni rohaNia sapanjangna;

²²gabe tano pusako ni Israel naposoNa i, hot do holong ni rohaNia sapanjangna.

²³Nada dihalupahon Ia hita dompak ditaluhon hita, hot do holong ni rohaNia sapanjangna.

²⁴Dipalua Ia hita sian tangan ni musunta, hot do holong ni rohaNia sapanjangna.

²⁵Ganop mahluk na mangolu dilehen Ia mangan, hot do holong ni rohaNia sapanjangna.

²⁶Dok ma tarimakasi tu Debata pangarajai ni langit; hot do holong ni rohaNia sapanjangna.