Read Batak Angkola MASMUR 143 Bible Online

MASMUR 143 - Batak Angkola bible

MASMUR 143

¹Masmur ni si Daud. Ale TUHAN, tangihon ma tangiangku, parrohahon ma pangidoanku. Alusi ma au hara ni habonaranMu, patulus ma tangiangku hara ni hatigoranMu.

²NaposoMu do au on, ulang ma timbang parkarongku, angke nada adong halak na so marsala di adopanMu.

³Diayak jana disampakkon musu i do au, jana ditaluhon situtu do au. Dipamasuk ia au tu hurungan na golap, gabe songon halak na dung honok mate noma au.

⁴Madung talu semangat au, angke madung mandele situtu au.

⁵Taringot ma di rohangku angka ari na salpu; hupasari-sari sude pambaenanMu, hupahusor-husor di bagasan rohangku sude na nipatupaMu.

⁶Martangiang au tu Ho dohot pahortang tangan; songon tano na hiang, tondingku manghalungunkon Ho.

⁷Alusi ma au saonnari, ale TUHAN, dibaen madung magotap arop ni roha. Ulang martabuni be tu au anso ulang songon halak na manuat tu hamatean au.

⁸Pasunggulkon ma tu au ganop manyogot holong ni rohaMu na manongtong i, angke tu Ho do au mararop roha. Hupasahat do tu Ho tangiangku patuduhon ma tu au dalan sibolusonku.

⁹Ro do au tu Ho giot maronding-onding, ale TUHAN, palua ma au sian angka musungku.

¹⁰Ajari ma au patuluskon hagiot ni rohaMu angke Ho do Debatangku. Sai ditogu TondiMu na burju i ma au di dalan na hornop.

¹¹Palua ma au hombar tu janjiMu, ale TUHAN, hara ni denggan ni basaMu, palua ma au sian hasusaan.

¹²Bunu ma sude na mamparhanciti au, dibaen holong do rohaMu di au. Matehon ma sude na manyosak au, dibaen naposoMu do au.