Read Batak Angkola MASMUR 21 Bible Online

MASMUR 21 - Batak Angkola bible

MASMUR 21

¹Tu na manguluhon kor. Masmur ni si Daud. O TUHAN, hara ni kuasoMu, marjop ni roha ma raja, marolop-olop ia, dibaen dilehen Ho hamonangan disia!

²Sude na nihalungunkon ni rohana tuk dibaen Ho, sanga aha na nipangidonia, dilehen Ho do.

³Ro Ho mandapotkon ia mardongan pasupasu na maruse-use, dipamasuk Ho tu ulunia tuku sere.

⁴Dipangido ia ngolu; umur na ginjang dilehen Ho disia, dohot dope ngolu na salolotna.

⁵Hara ni pangurupiMu mambaen tangkas ia tarida, dibaen Ho goarnia marmulia jana tarbarita.

⁶Sai didongani pasupasuMi do ia ro di salolotna. HaroroMu mambaen ia gok jop ni roha.

⁷Mararop roha tu TUHAN i do raja i, sai sonang do ia, angke tongtong do ia dihaholongi TUHAN Na Markuaso i.

⁸Ditangkup ia sude musuNia, ditaban Ia sude na margoyak ni roha mida Ia.

⁹Dibaen Ho do halahi songon api na marjembur-jembur, dihatiha dipataridahon Ho diriMu, ale TUHAN. Abis ma halahi baenon ni muruk ni TUHAN, bope baenon ni api na mambaen marmosokan.

¹⁰Nada adong na tading sian pomparan ni halahi, giot bunuon ni raja sude halahi.

¹¹Dibaen halahi tahi mangalo raja, tapi sangkap ni halahi na jahat i nada marguna.

¹²Giot tembakkononNia anak ni panaNia i, gabe marputar halahi lalu marlojongi.

¹³Hami puji do Ho TUHAN, hara godang ni kuasoMu, marende do hami mamuji hagogoanMu.