Read Batak Angkola MASMUR 24 Bible Online

MASMUR 24 - Batak Angkola bible

MASMUR 24

¹Masmur ni si Daud. TUHAN do nampuna tano dohot pangisina, portibi dohot sude na manginganisa.

²Dipayakkon Ia ojahanna di laut na bidang i, dipajongjong Ia di aek na bagas i.

³Ise do na patut manangkok tu Dolok Ni TUHAN,[3] ise do na patut jongjong di ingananNia na badia i?

⁴Halak na ias di roha dohot pambaenan, na so marsumpa na pargabus sanga na manyomba gana-ganaan.

⁵Pasupasuon do halahi jana paluaon tu joloan on. TUHAN mandok, halahi nada marsala.

⁶Songon i ma halak na ro tu jolo ni Debata, tu adopan ni Debata ni si Jakob laho manyomba.

⁷Patalak ma horbangan na robi, anso masuk Raja Na Marmulia i.

⁸Ise he Raja Na Marmulia i? I ma TUHAN na sun gogo; TUHAN na gok kuaso, na so jungada talu di parporangan.

⁹Patalak ma horbangan na robi, anso masuk Raja Na Marmulia i.

¹⁰Ise he Raja Na Marmulia i? TUHAN Na Markuaso, Ia do Raja Na Marmulia!