Read Batak Angkola MASMUR 25 Bible Online

MASMUR 25 - Batak Angkola bible

MASMUR 25

¹Masmur ni si Daud. Tu Ho do, ale TUHAN, hupasahat tangiangku,

²o TUHAN, Ho do haposan ni rohangku! Ulang padiar dipaila au, jana disurahi angka musungku.

³Sai na pataluon do sanga ise halak na manjehei Ho, na pasti monang do halak na manghaposi Ho.

⁴Patidahon ma tu au hagiot ni rohaMu ale TUHAN, patangkas ma sanga aha sipatupaonku.

⁵Ajari au mangolu hombar tu hagiot ni rohaMu, angke Ho do antong Debatangku; Ho do na palua au, sai tu Ho do mararop ni roha au.

⁶Ingot ma denggan dohot holong ni rohaMu, na nipatidahonMu mamungka sian hatiha na salpu.

⁷Sesa ma dosa dohot hasalaan di hatiha haposoonku, ingot ma au, hombar tu holong dohot denggan ni rohaMu.

⁸Angke na denggan do TUHAN jana tigor do haputusanNia, dipatidahon Ia do dalan tu halak pardosa.

⁹Diajari TUHAN do halak na toruk marroha, anso diihutkon halahi hagiotNia.

¹⁰Tu halak na patulus parjanjian dohot aturanNia dibaen Ia holong ni roha dohot habonaranNia.

¹¹TUHAN, songon janjiMi ampuni ma au, angke bahat situtu do dosangku.

¹²Diajarkon TUHAN do tu halak na unduk roha, dalan na giot bolusonna.

¹³Sai na mardame do ngoluna, tano pusako teanon ni anak maradu pahompuna.

¹⁴Ale-ale ni TUHAN do halak na mabiar tuSia jana dipaboa Ia do janjiNa tu halahi.

¹⁵Sai manatap do matangku adop TUHAN, dipalua Ia do au sian parmaraan.

¹⁶Tatap ma au, jana ibo ma rohamu mida au, TUHAN, angke gale do au jana punjung so mardongan.

¹⁷Palapang ma rohangku sian hasompitan, palua ma au sian hasusaan.

¹⁸Ligi ma pardangolan dohot hasompitanku, jana sesa ma sude dosangku.

¹⁹Ligi ma bahat ni musungku, jana songon i ma gigi ni roha ni halahi tu au.

²⁰Jagohon ma au ulang jabat ditaluhon, tu Ho do au ro mangido pangondian.

²¹Sai hadengganan dohot hatigoran ma mangondingi au, angke Ho do pos ni rohangku.

²²Ale Debata, palua ma Israel bangsoMi sian sandok hasusaan i.