Read Batak Angkola MASMUR 27 Bible Online

MASMUR 27 - Batak Angkola bible

MASMUR 27

¹Masmur ni si Daud. TUHAN do hatiuran ni ngolungku dohot sipalua au, nada adong habiaranku. TUHAN do benteng parondinganku, nada pola humitir au.

²Muda ro parjahat mangaroro giot mamunu au, tartuktuk ma halahi lalu madabu.

³Haru pe dihaliangi parangan na bahat au, nada pola mabiar au. Haru ro pe musu mamorangi, tongtong mararop roha au tu Debatangki.

⁴Hum sada do na hupangido tu TUHAN, hum i ma na huhalungunkon: Tinggal di Bagas Ni TUHAN salolot ni ngolungku, laho mandai hadengganan ni TUHANku jana mangido panogunoguonNa.

⁵TUHAN do mangondingi au di hatiha parmaraan, mamunihon au di BagasNa, mangabing au tu ginjang ni dolok batu.

⁶Jadi saonnari madung godang au di angka musu na humaliang au. Mardongan sora na gogo marmoga-moga huhaulkon ma haul mandok tarimakasi di bagasMu; marende ma au tu TUHAN lalu mamujiSa.

⁷Tangihon ma ale TUHAN, muda pio-pio au tu Ho, ibo ma rohaMu mida au jana alusi ma au!

⁸Ho mandok, “Ro marsomba tu Au.” Hualusi do, “Ale TUHAN, manigor ro pe au.”

⁹Ulang ma martabuni Ho sian au. Ulang muruk Ho tu au; ulang suru kehe, naposoMu do au on. Angke sai Ho do pangurupi di au on, ulang tadingkon au, ale Debatangku, na paluahon au.

¹⁰Haru pe ditadingkon damang dohot dainang au, tapi anggo Debata sai tongtong do patureonNa au.

¹¹Ajari au ale TUHAN anso mangolu au marguru tu giotMu. Di dalan na aman ma togu au angke na bahatan do musungku.

¹²Ulang pasahat au tu alongku, na mangaroro au mardongan hasaksian gabus dohot hakejamon.

¹³Pos do rohangku daionku do hadengganan ni TUHAN dompak dison di hangoluan.

¹⁴Mararop roha tu TUHAN ma da, haporsayai ma, ulang padele roha. Tu TUHAN ma mararop roha.