Read Batak Angkola MASMUR 28 Bible Online

MASMUR 28 - Batak Angkola bible

MASMUR 28

¹Masmur ni si Daud. Sai pio-pio tu Ho do au ale TUHAN pangondianku, sai tangihon ma pangidoanku! Muda sai hohom Ho sai songon halak na manuat tu tanoman do au.

²Tangihon ma pangidoanku, muda huangkat tanganku adop BagasMu.

³Ulang uhumi au rap dohot halak na durako, rap dohot halak sibaen hajahatan na so labo. Tabo-tabo do begeon hatana manarik tu roha, hape gok hagigian do anggo di ate-atena.

⁴Baloskon ma tu halahi hombar tu pambaenanna, jana satimpal tu hajahatanna.

⁵Nada diampirkon halahi pambaenanMu da TUHAN; karejoMu pe nada diparrohahonsa. Jadi gabe uhumanMu ma halahi jana agoonMu halahi salolot-lolotna.

⁶Nipuji ma TUHAN i, angke madung ditangihon Ia pangidoanki.

⁷Diondihon jana diampini TUHAN do iba, tuSia ma au marpos ni roha. Diurupi jana dipagodang Ia do rohangku, marmoga-moga hupuji ma Ia mardongan ende puji-pujian.

⁸Diondihon TUHAN i do bangsoNa, diampini jana dipalua Ia do raja na nipiliNia.

⁹Palua ma TUHAN, bangsoMi pasupasu ma sanga ise halak na gabe nampunaMi. Ho ma na gabe songon parmahan di halahi, jana jagohon ma halahi salolot-lolotna.