Read Batak Angkola MASMUR 32 Bible Online

MASMUR 32 - Batak Angkola bible

MASMUR 32

¹Masmur ni si Daud. Ende sipodaon. Martua ma sanga ise na dung nisesa pangalaosina, jana na nitutupan dosana.

²Martua ma sanga ise na so nietong ni TUHAN hajahatanna, jana na bulus rohana.

³Salolot nada huoku dosangku, mardangol do pangkilalaanku hara ni na tangis sasadari.

⁴Diuhumi Ho do au ale TUHAN, arian na borngin, merus gogongku songon aek na maruas dibaen las ni ari.

⁵Jadi gabe huoku dosangku tu Ho, nada adong hubunihon hasalaanku tu Ho. Diputuskon rohangku do mangoku i tu Ho, gabe diampuni Ho sude dosangku tu Ho.

⁶Hara ni i, patut do angkon martangiang tu Ho sude na burju marroha dompak adong dope tinggi giot marsuo dohot Ho. Jadi muda ro pe hasusaan mangalantap, nada jabat hona be halahi.

⁷Ho do inganan parsimonjapanku, diondingi Ho do iba sian mara. Gabe marsurak ma au hara ni moga ni roha, dibaen dipalua Ho do antong iba.

⁸Didok TUHAN, “Hupatuduhon pe dalan sibolusonmu. Hutogu pe ho jana Hupaingot.

⁹Ulang songon kudo na so marroha, siaturon marhite kokang dohot tali. Muda nada songon i, nada ra ia mangoloi.”

¹⁰Sanga ise angka pardosa, dondonan ni bahat hasusaan; tapi anggo na marpos ni roha tu TUHAN sai hot do i dilinggomi jana dihaholongi Tuhan.

¹¹Marjop ni roha ma hara ni TUHAN, o hamu halak na burju roha, marsurak ma hamu marmoga-moga, hamu sude na burju mangoloisa!