Read Batak Angkola MASMUR 36 Bible Online

MASMUR 36 - Batak Angkola bible

MASMUR 36

¹Tu na manguluhon kor. Sian si Daud naposo ni TUHAN. Halak na jahat mangihutkon pangelek ni dosa; umpe mabiar ia saotik mida Debata.

²Hara ni ginjang ni rohana, diambang ia na so diboto TUHAN dosania jana nada uhumanNa ia.

³Gok sipaoto-oto, jahat angka hatana, anggo na denggan dohot habisuhon nada dibaensa.

⁴Di podomannia; dibaensa sangkap na jat, nada adong pangalahona na denggan nada unjung ditulak ia hajahatan.

⁵O TUHAN, sagincat ni langit holongMu na manongtong i, jana haburjuonMu manyalpui angka ombun i.

⁶HadenggananMu marsijongjong songon gincat ni dolok, jana hatigoranMu songon bagas ni laut. Jolma dohot angka binatang, dipasari-sari Ho do, ale TUHAN.

⁷Na arga ma da antong holong ni rohaMu na manongtong i ale Debata, marlinggom di toru ni habongMu do hami.

⁸Butongan hami di sipanganon na marlobi-lobi na niparadeMu, mardongan inumon na sian batang aekMu na patogarkon.

⁹Ho do mual haroroan ni ngolu di sude na adong, di bagasan sinondangMu hami ida na torang.

¹⁰Sanga ise na mananda Ho, sai hot ma nian dihaholongi Ho, jana parroha sisangunjur lehenonMu hadengganan.

¹¹Ulang padiar au disoro halak na gakgak, sanga dipaorot halak na jahat.

¹²Ligi ma sanga di dia madabu halak na jahat, disi ma halahi julung, nada tarbaensa jongjong mulak.