Read Batak Angkola MASMUR 38 Bible Online

MASMUR 38 - Batak Angkola bible

MASMUR 38

¹Masmur ni si Daud. Di hatiha na manghaulkon haul parningotan. TUHAN, ulang uhumi au di bagasan parpiar ni murukMu, ulang parhanciti au di milas ni rohaMu.

²Pantom do panaMu mambugangi pamatangku, dokdok hilalaon pandondoni ni tanganMu.

³Hancit do huhilala hara ni parpiar ni murukMu, hara ni dosangku, nada adong torkis be pamatangku.

⁴Mogap-ogap do au di bagasan pangalantap ni hasalaanku, maborattu boban ni dosangku tanggungonku.

⁵Marnanai angka na mabugang i jana muap bau, hara ni na dung mangasa bodo au.

⁶Puhung au, magete ate-atengku, sasadari sai marsak jana susa rohangku.

⁷Arun songon na manutung pamatangku, nada adong be togar simanarengku.

⁸Magopu noma au jana abis gogongku, masego rohangku, mariale hara ni hancitna.

⁹Tuhan, diboto Ho do sandok lungun ni rohangku, nada buni di Ho holos ni rohangku.

¹⁰Mangabis gogongku, taroktokku gumadobur, matangku pe mahomur.

¹¹Mandao be ma ale-alengku hara ni nyaengku, salang koum sisolkotku pe mandao do sian au.

¹²Halak na sai giot mamunu au, manaon jorat; sasadari hum na mambaen tahi na jahat, laho mangago au mardongan tipu akalna.

¹³Hape songon na maingol do au na so marbinege, songon halak na ngungu na so malo mangecet.

¹⁴Tutu do, songon halak na so marbinege au, jana i ma dalanna nada tarbaen mungkap manjua.

¹⁵Haru pe songon i, mararop roha tu Ho do au, ale TUHAN, jana dialusi Ho au, Ho ale Tuhan, Debatangku.

¹⁶Ulang padiar marhasonangan musu i hara ni pardangolanku, ulang paloas manggambung halahi hara ni hataluanku.

¹⁷Tartuktuk do au jana saotik nari noma anso dabu, sai na torus noma hancitan au.

¹⁸Huoku do hasalaanku, marsak rohangku hara ni angka dosangku.

¹⁹Bahat do musungku jana gogo, hosom roha ni halahi mida au, dalanna so binoto.

²⁰Hajahatan do dibaen halahi balos ni hadengganan, jana dimusu halahi au, hara ni na huparayak na denggan.

²¹Ale TUHAN, ulang ma tadingkon au, ale Debatangku, ulang mandao Ho sian au.

²²Ompoti ma mangurupi au, ale Tuhan, Sipalua au.