Read Batak Angkola MASMUR 39 Bible Online

MASMUR 39 - Batak Angkola bible

MASMUR 39

¹Tu na manguluhon kor. Masmur ni si Daud. Di si Jedutun. Ning rohangku, “Manat-manat noma au di sibaenonku, jana nada be ra au mardosa di angka pandohanku. Nada ra au manghobari salolot donok halak parjahat i.”

²Manguntam au mangkohom, na denggan pe nada hudokkon, hape mur borat do pandondoni ni sitaonon.

³Mur rongom do biar na santak, mur nipikiran, mur susa rohaniba, ujungna hudok ma,

⁴“O TUHAN, paboa ma sanga andigan do ajalku anso huboto na pendek do hape ngolungku.”

⁵Pendek na i hape ditontuhon Ho umurku! Nada adong arti ni lolot ni ngolungki di adopanMu. Tontu ma da, hum songon sangombus hosa do jolma,

⁶nada lobi sian halinu. Nada adong arti ni sude halojaonna. Dipalagut ia arta, hape so dibotosa sanga ise na giot mamakesa.

⁷Saonnari aha dope na hupainte, ale Tuhan? Tu Ho do au mararop roha.

⁸Palua ma au sian sude dosangku, ulang padiar au gabe siincahan ni halak na bodo.

⁹Hohom noma au, nada be dokkononku bagi aha, angke Ho na mambahen sitaononki.

¹⁰Ma jabat mate ne iba hara ni pambalbalMu, ulang be da ulahi manguhumi au!

¹¹Diuhum Ho do jolma jana diajar Ho hara ni hasalaanna do. Songon ngitngit, dilantuk Ho sanga aha hagiotna. Tutu ma da, hum songon sangombus hosa do jolma.

¹²Tangihon ma ale TUHAN, tangiang pangidoanku; parrohahon ma ilu-ilungku, ulang ma hohom Ho tu au. Laing songon angka daompung na umpompar au, hum sangombas sajo do manompang tu Ho au.

¹³Tadingkon ma au, anso marsonang-sonang au, painte kehe au jana gabe soada be.