Read Batak Angkola MASMUR 40 Bible Online

MASMUR 40 - Batak Angkola bible

MASMUR 40

¹Tu na manguluhon kor. Masmur ni si Daud. Sobar do au paintehon pangurupi ni TUHAN; ditangihon jana diparrohahon Ia do pio-piongku.

²Ditarik Ia do au sian godung parmaraan, diela Ia do au sian ombik na bagas. Dibaen Ia au tu ginjang ni dolok batu, gabe sonang au.

³Diajari Ia do au mangendehon logu na imbaru, logu na mamuji Debatanta. Bahat do halak midasa jana gabe mabiar, gabe manghaporsayai TUHAN.

⁴Martua ma sanga ise na porsaya tu TUHAN; na so dohot-dohotan marsomba tu angka debata, na so mangido tolong tu halahi.

⁵TUHAN, na bahat ma antong di hami pambaenanMu, ale TUHAN Debatanami, nada adong tudosanMu! Bahat do karejoMu na gabe hahomangan di hami, nada tarpajojor sudena i.

⁶Haul sipanganon na niparade nada por rohaMu disi haul hasesaan ni dosa nada diigil rohaMu i. Hape madung dilehen Ho simanangingku na tarbaen umbege soraMu.

⁷Gabe hualusi ma, “Dison do au, tarsurat do di bagasan buku taringot tu au.

⁸Jop rohangku patuluskon hagiotMu, ale Debata, tarsimpan do pangajaranMu di bagasan rohangku.”

⁹Di parpunguan ni bangsoMu hupajojor-jojor do jamita na denggan salaho tu haluaan na nilehenMu. Nada marnamantak i hupabotohon, diboto Ho do i sudena da TUHAN.

¹⁰Di parpunguan ni bangsongku nada hupahohom, barita haluaan i nada hurahasiahon. Sai na hupajojor-jojor do haburjuan ni rohaMu, pangurupiMu dohot holong ni rohaMu na so mantak i.

¹¹TUHAN, huboto do na so ra mantak Ho manghaholongi au; holong dohot hadengganan ni rohaMu sai i do na giot mangondihon au.

¹²Dirongomi parmaraan na jorbut do au na so taretong bilanganna. Diayak-ayak angka dosangki do au nada tarbaen au be mangaligi. Bilanganna lobi sabahat ni obuk na di ulungku, na mambaen manderse rohangku.

¹³Palua ma au, ale TUHAN, manigor urupi ma au!

¹⁴Padiar ma halak na giot mamunu au ditaluhon jana maporus so diboto tondongonna. Padiar ma ditulak jana marbile halak na manggorai bagianku.

¹⁵Padiar ma gabe heput jana maila halak na martataihon au.

¹⁶Sai marmoga-moga jana marjop ni roha ma sandok halak na manjalahi Ho. Sai sude ma nian mandok tarimakasi hara ni haluaan na nilehenMu torus mandok, “Na godang ma da TUHAN tutu!”

¹⁷Na gale do au on jana na pogos, ale Tuhan, hape diparrohahon Ho do au. Ho do na mangurupi dohot na paluahon au, tibu ma Ho ro, ale Debatangku!