Read Batak Angkola MASMUR 41 Bible Online

MASMUR 41 - Batak Angkola bible

MASMUR 41

¹Tu na manguluhon kor. Masmur ni si Daud. Martua ma halak na mamparrohahon jolma na gale; urupan ni TUHAN do ia di hamamasa ni hasusaan.

²Ondihonon jana pareso-resoon ni TUHAN ma hosania; partuaan ni TUHAN ma ia di portibi on, jana nada pasahatonNia ia tu tangan ni musuna.

³Tolongon ni TUHAN ma ia muda dompak marnyae, jana pasuangonNa hatorkisanna.

⁴Ningku do, “Mardosa maradopkon Ho do au ale TUHAN, ibo ma rohaMu di au jana pamalum ma au.”

⁵Dipardokkoni musungku do na jahat taringot tu au, giot ni halahi mate ma nian au jana dihalupahon.

⁶Angka na marroan mangaligi au, marroha na jat do halahi tu au. Dipalagut halahi do hata-hata na so ture salaho tu au, jana dipasarsar halahi ma i sun tu jae tu julu.

⁷Marhusipi do sude na manghosomi au jana dipikiri halahi do na jahat taringot tu au.

⁸Didok halahi ma, “Pasang sajo do da nyaena i, nada tarbaen mungkap be i.”

⁹Salang ale-aleniba na umdonok pe antong, halak na mangan rap dohot iba, madung mangalo tu iba.

¹⁰Ibo rohaMu di au, ale TUHAN, pamalum ma au, anso tarbaloskon au jolo hajahatan ni angka alongku.

¹¹Muda nada tartaluhon halahi au, botoonku ma bahaso na jop rohaMu mida au.

¹²Diurupi Ho do au hara ni bulus ni rohangku, jana dibaen Ho au mangolu rap dohot Ho sapanjangna.

¹³Puji ma TUHAN, Debata ni Israel! Puji ma Ia saonnari bope sapanjangna! Sai tulus ma songon i. Amen!