Read Batak Angkola MASMUR 42 Bible Online

MASMUR 42 - Batak Angkola bible

MASMUR 42

¹Tu na manguluhon kor. Ende pangajaran sian horong ni si Kora. Songon ursa na manghalungunkon batang aek, songon i do tondingku manghalungunkon Ho, ale Debatangku.

²Malungun au di Ho, ale Debata na mangolu, andigan do tola au marsomba di BagasMu?

³Arian na borngin sai tangis do au, hum ilu-ilu noma balanjongku. Ari-arion do sai sapa-sapa musungku, “Di dia ma he Debatamu?”

⁴Malala ate-atengku muda huingot hatiha na salpu, di na mardalan tu Bagas Ni Debata rap dohot halak na bahat au. Mardalan di jolo ni barisan i ma au, mardongan surak-surak dohot ende pamujian.

⁵Biasi marsak au jana susa rohangki? Tu Debata noma au mararop roha, jana mandok tarimakasi tuSia, tu Debatangku jana Sipalua au.

⁶Magopu ate-atengku di tano habuangan on, hara ni i taringot rohangku tu Ho. Mayup-ayup tondingku di bagasan galumbang ni arsak, songon aek magodang hagaoron manondong iba, songon parhusasak ni sampuran ni Batang aek Jordan, sian Dolok Hermon dohot Dolok Misar.

⁸Sai dipatuduhon TUHAN ma nian holong ni rohaNa na mamanjang di hatiha torang ni ari, anso tarbaen au marende di bornginna i, jana martangiang tu Debata haroroan ni ngolungki.

⁹Hudok ma tu Debata, na mangondihon au, “Biasi dihalupahon Ho au? Biasi angkon laing manaon parkancitan au, hara ni panyosak ni angka musungku?”

¹⁰Magopu rohangku hara ni pangincahi ni musu i. Sai torus do sapa-sapa halahi, “Di dia ma he Debatami?”

¹¹Biasi marsak jana susa ho rohangku? Tu Debata noma au mararop roha, jana mandok tarimakasi mangulahi tuSia, tu Debatangku jana Sipalua di au.