Read Batak Angkola MASMUR 49 Bible Online

MASMUR 49 - Batak Angkola bible

MASMUR 49

¹Masmur ni horong ni si Korah. Di na manguluhon ende. Tangihon ma sude angka bangso, patinggil ma pinggolmunu, hamu pangisi ni tano on,

²bope halak na menek, dohot muse halak na godang, na pogos bope na maradong.

³Ruar ma sian pamanganku angka hata habisuhon, bagas do arti ni na tubu sian pikiranku.

⁴Parrohahononku ma hata pandohan, lalu mamiltik hasapi, hupatorang impolana.

⁵Nada huhabiari angka ari hasusaan, di na hona hobuk iba di parmaraan,

⁶angka halak na jahat na mangasahon hakayoanna, jana na manghaginjangkon sinadonganna.

⁷Nada adong sahalak pe na tarbaen manobus hosana, sanga manggarar partobusna tu Debata.

⁸Nada i mambaen tuk, sanga aha pe na nilehennia, magodangtu do arga ni partobus ni hosana,

⁹anso sili ia sian hamatean jana mambaen ia marhangoluan sapanjang.

¹⁰Sanga ise pe tarbaensa do mangaligi, halak na marroha pe laing mate do. Halak na bodo dohot na oto laing rap abis, jana manadingkon sinadonganna di halak na asing.

¹¹Maringanan di kuburan noma halahi salolotna; disi noma halahi mian sapanjang manyahena, haru pe dompak di ngoluna, bahat ladang nampunana.

¹²Nada tarbaen jolma i martahan di hajagaronna, laing songon binatang i, ingkon mate muse do ia.

¹³Songon i ma bagian ni halak na mangasahon dirina, ujung ni jolma na puas dibaen hatana.

¹⁴Ditontuhon hian do halahi mate songon biri-biri; hamatean i noma marmahan halahi. Manulus do halahi manuat tu kuburan jana maringanan di bagasan hamatean, manigor malangke ma pamatang ni halahi.

¹⁵Tapi anggo au paluaon ni Debata noma, paluaonNia do au sian hamatean.

¹⁶Ulang habiari muda gabe maradong sada-sada halak, jana mur martamba sinadonganna.

¹⁷Muda mate ia, nada tarobansa sanga na aha, nada jabat dohot artana i manuat tu kuburan i rap dohot ia.

¹⁸Salang muda adong pe halak na mardohar di ngoluna, jana na nipanggar-panggar hara ni doharnia,

¹⁹laing na mangihut do ia tu angka ompuna muse tu inganan na golap salolot-lolotna.

²⁰Nada tarbaen jolma martahan di hajagaronna, laing songon binatang i, ia pe mate do muse.