Read Batak Angkola MASMUR 5 Bible Online

MASMUR 5 - Batak Angkola bible

MASMUR 5

¹Tu na manguluhon kor. Mardongan suling. Masmur ni si Daud. Ale TUHAN, tangihon ma angka hatangku, parrohahon ma angka holso ni rohangku.

²Pio-pio do au tu Ho urupi ma au, o Rajangku jana Debatangku.

³O TUHAN, pangidoanku tu Ho muda manyogot sai tangihon ma tangiangku, di na maroban haul au tarpainte do au Tuhan di alusMu.

⁴Anggo Ho ale Debata, nada dihagioti rohaMu hajahatan; halak na jahat nada dipaloas Ho masuk tu BagasMu.

⁵Nada lomo rohaMu mida halak na jungkat, jana goyak do rohaMu mida sude sibaen na jahat.

⁶Dipusa Ho do angka pargabus ditulakkon Ho do pangicu dohot pamunu.

⁷Tapi hara ni holong ni rohaMu, tola do au masuk tu BagasMu, manungkap adop ingananMu, lalu marsomba tu Ho mardongan roha na marsitutu.

⁸TUHAN, na bahatan do angka musungku! Togu ma au patuluskon giot ni rohaMu, jana pahornop ma dalanMu na giot hudalani.

⁹Nada haposan anggo hata ni musungku; giot ni halahi, sai mago ma nian au. Tabo do begeon hata na nidok ni halahi, hape anggo roha ni halahi hum na giot manjahati.

¹⁰Ale Debata, laing diadili ma da halahi anso mago sandiri halahi baenon ni roha ni halahi i maradopkon Ho do halahi manggagai paorot ma halahi hara ni dosa ni halahi na bahat i.

¹¹Marjop ni roha ma sanga ise na marlinggom tu Ho, mardongan jop ni roha marende-ende sai na tarbaen halahi do! Diramoti Ho do halak na manghaholongi Ho, sai marjop ni roha halahi hara ni Ho.

¹²Angke dipasupasu Ho do sanga ise na mangoloi Ho, markite-hite holong ni rohaMu, halahi diramoti Ho.