Read Batak Angkola MASMUR 58 Bible Online

MASMUR 58 - Batak Angkola bible

MASMUR 58

¹Tu na manguluhon ende. Mangihutkon logu: Ulang manyegohon. Masmur ni si Daud. O hamu angka parkuaso, tigor dehe haputusanmunu? Tigor dehe di na manguhumi jolma hamu?

²Nada, niet na jat do di bagasan rohamunu, jana mangasa gogo do hamu di luat on.

³Na lilu do halak parjahat mamungka sian bortian, na manipu do halahi mamungka sorang.

⁴Marbisa do halahi songon ulok, jana maingol songon ulok sonduk,

⁵na so manangi di sora ni pawang na malo, sanga di sora ni panjampi na umboto.

⁶Ale Debata, ropangkon ma ipon na di pamangan ni halahi, umpatkon ma sait ni angka singa jara-jara i, TUHAN.

⁷Padiar ma mago halahi songon aek na maruas, songon ruput na malos na nidegean di dalan.

⁸Padiar ma halahi songon langkitang na maderder gabe godir, songon dakdanak na baru sorang mate dompak so marnida na torang.

⁹Painte so hona dope angka hudonmu tu api madung dipangabis Ia angka na mangolu bope na dung mosok.

¹⁰Marjop ni roha halak na burju, paida-ida halak parjahat hona uhum, jana mambasu patna dohot mudar ni halak na durako.

¹¹Dokkonon ni halak ma, “Dapotan pahalo do da antong halak na denggan, tutu do i, adong do Debata na manguhumi di portibi on.”