Read Batak Angkola MASMUR 59 Bible Online

MASMUR 59 - Batak Angkola bible

MASMUR 59

¹Tu na manguluhon ende. Mangihutkon logu: Ulang manyegohon. Masmur sian si Daud, di na nisuru ni si Saul halak manjagoi bagasnia laho mamunu ia. Ale Debatangku, palua ma au sian angka musungku, ondihon ma au sian halak na mangaroro au.

²Palua ma au sian halak sibaen jahat, paluncat ma au sian angka sibunu jolma.

³Ligi bo, ma singkop halahi giot mamunu au, mardomu halak na jahat laho manyoro au; hape nian nada hara ni na mardosa au, sanga na hulaosi aturanMu, ale TUHAN.

⁴Haru pe nada marsala au, dilojongi halahi do jana marhobas.

⁵O, TUHAN, Debata Na Markuaso, i ma Debata ni Israel. Jongjong ma Ho jana uhumi ma angka bangso, indangkon sai pola ibo rohaMu mida halak panghianat.

⁶Di andospotang mulak ma halahi songon anjing na mangorong, manghaliangi kota manjalahi sisoroon.

⁷Torus do halahi manjalahi sindir dohot mangalayasi, hata ni halahi maradu tajom songon podang, diambang halahi na so adong na umbegesa.

⁸Hape dipartatai Ho do halahi, ale TUHAN, diterge Ho pe soada angka bangso parjahat.

⁹Ho do gogongku, di Ho ma ende pujianku, angke Ho do Debata, inganan pangungsianku.

¹⁰Dihaholongi jana didapotkon Debatangku do au, dipaloas Debatangku do au marnida hataluan ni musungku.

¹¹Ulang bunu halahi, anso ulang lupa bangsongki. Marhite kuasoMu, ayak ma halahi cuka-ciri, taluhon ma halahi, ale Tuhan pangondiannami.

¹²Angke mardosa do halahi hara ni pamanganna, marhite angka hata na nipardokkonanna. Padiar ma tardapot halahi di ginjang ni rohana, angke sai na giot mamurai do halahi dohot na margabusi.

¹³Pangabis ma halahi ale Debata, di bagasan hamuruhonMu, pangabis ma halahi lopus punu. Gabe sude ma halak umboto bahaso Debata do mamarenta di pomparan ni si Jakob, jana mangararati do pangarajaionNa tu sude tano on.

¹⁴Di andospotang marmulakan ma musungku songon anjing na mangorong, manghaliangi kota manjalahi sisoroon.

¹⁵Songon anjing na manghaisi sarop do halahi, jana marauang muda nada butong.

¹⁶Tapi anggo au huendehon do hagogoanMu; ganop manyogot huendehon do holong ni rohaMu na manongtong i. Angke Ho do inganan pangungsianku, inganan parondingan di au di hamamasa ni susa.

¹⁷Ho do hagogoonku, di Ho ma ende pujianku, angke Ho do Debata, inganan pangungsianku, ale Debata, sai na holong do rohaMu mida au.