Read Batak Angkola MASMUR 6 Bible Online

MASMUR 6 - Batak Angkola bible

MASMUR 6

¹Tu na manguluhon ende. Mardongan hasapi. Mangihutkon logu na pasalapankon. Masmur ni si Daud. TUHAN, ulang muruk Ho jana ulang tulakkon au, ulang uhumi au di bagasan muruk ni rohaMu.

²Ibo ma rohaMu mida au, angke abis ma gogongku da TUHAN, pargogoi ma au, angke madung gale-gale au.

³Ale TUHAN, na sun ma sompit ni rohangku, sadia honok nari tadingkononMu au?

⁴Sai marpangulahi ma rohaMu jana palua ma au, palua ma au hara ni holong ni rohaMu.

⁵Angke anggo dung do di hamatean nada ingoton be Ho, anggo di inganan ni halak na mate nada adong be mamuji Ho.

⁶Humolos au pola marsak situtu; ganop borngin mardodor ilungku, manombur podomanku.

⁷Rambon do da matangku hara ni arsak, jana golap hara ni angka musungku.

⁸O, angka na jahat, morot ma hamu madung ditangihon TUHAN tangisku.

⁹Diparate-atehon Ia do tangiangku, jana dioloi Ia pangidoanku.

¹⁰Sude musungku giot pailaonNa, jana sumurut halahi maporus sun tu dia.