Read Batak Angkola MASMUR 62 Bible Online

MASMUR 62 - Batak Angkola bible

MASMUR 62

¹Tu na manguluhon ende. Mangihutkon: Si Jedutun. Masmur ni si Daud. Hupainte Debata, di bagasan sada ni rohangku, hum sian Ia sajo do haluaanku.

²Hum Ia do na mangondihon dohot na paluahon au, Ia do mambela au, nada taluhonon be au.

³Gabur do au songon tembok na giot marobo; intap ni andigan hamu sai giot mamorangi dohot mamisat au?

⁴Hum na giot mandabuhon ia do halahi sian pangkatna na timbo; jop do roha ni halahi margabus; markite-hite pamangan halahi mamasumasu, tapi mamurai do halahi di bagasan roha.

⁵Hupasada do rohangku paintehon Debata, hum tuSia do au mararop roha.

⁶Hum Ia do na mangondingi dohot na paluahon au, Ia do mambela au, nada tartaluhon be au.

⁷Ia do Debata na mangalehen haluaan dohot hasangapan di au. Debata do pangondianku dohot na gogo mambela au.

⁸O hamu bangsongku, sai tu Debata ma hamunu mararop roha, usehon ma isi ni rohamu tuSia, angke Ia do inganan parsiholipanta.

⁹Anggo jolma sangombus hosa do i na godang sanga na menek rap na so mararga do i. Muda nitimbang, tardapot ma halahi na nayang, numayang sian sangombus hosa.

¹⁰Ulang arop rohamu di angka barang na nirampas, jana ulang marpangunsandean tu angka na nirampas. Muda pe martamba hakayoanmu, ulang lohot tusi rohamu.

¹¹Piga-piga noli ma hubege didok Debata, anggo kuaso na sian Ia do asalna,

¹²jana anggo holong ni rohaNia manongtong do sapanjangna. Ho do mamalos ale Tuhan tu ganop halak marguru tu pangalahona.