Read Batak Angkola MASMUR 64 Bible Online

MASMUR 64 - Batak Angkola bible

MASMUR 64

¹Tu na manguluhon ende. Masmur ni si Daud. Ale Debata, tangihon ma tangiangku dompak susa au, palua ma ngolungku sian musu na jorbut.

²Ondingi ma au sian pangaroha-rohai ni halak na so hasaya, sian kompolotan ni angka parjahat.

³Dipatajom halahi do dilana songon podang, mandokkoni angka hata na tajom songon pana.

⁴Di na buni didabuhon halahi do goar ni halak na daulat; ompot na so pamotoan, so pola umboto hahaila, ditilakoi halahi ma ia lopus soada.

⁵Togu do halahi marsitiopan tu sangkap na jahat na nibaenna; marpokat halahi laho manaon tirangkap, jana marpikir nada adong halak marnidasa.

⁶Disangkap halahi do patupa parbuatan na jat jana diambangsa ma na dung sanggam sangkapna. Nian mabagastu do dodoan roha dohot ate-ate ni jolma.

⁷Hape ditembakkon Debata do panaNia tu halahi, jana manigor mabugang ma halahi.

⁸PasidungonNia ma halahi hara ni hata ni halahi, mopeng-openg be ma sude na marnidasa.

⁹Gabe mabiar be ma halak sudena; marpikir be ma halahi salaho tu pambaenan ni Debata, jana pararatkon sanga aha na dung dipatupa Debata.

¹⁰Gabe marmoga-moga ma sude halak na burju hara ni sasude na nibaen ni TUHAN. Marpangondian tuSia ma halahi, pujion ni sude halak na tigor ma Ia.