Read Batak Angkola MASMUR 7 Bible Online

MASMUR 7 - Batak Angkola bible

MASMUR 7

¹Andung na niendehon ni si Daud tu TUHAN, hara ni si Kus halak Benyamin i. O TUHAN Debatangku Ho do onding-ondingku. Palua ma hosangku sian halak na mangayak au.

²Ulang ma padiar songon singa halahi manyoro au; pola disuak-suak au, lalu disarat, dipadiar so adong na mangurupi.

³TUHAN Debatangku, sugari hubaen hajahatan, mambaen na jat tu dongan, sanga hurugi i alo so adong alasan, muda adong sada sian i hukarejohon,

⁵padiar ma au diayak jana ditangkup musu, torus dibunu jana ditinggalkon di bagasan abu.

⁶O TUHAN jongjong ma Ho di bagasan rimasMu, alo ma panggosa ni musungku. Jongjong ma Ho jana urupi ma au, angke Ho do na manjalaki hatigoran.

⁷Palagut ma angka bangso na humaliang Ho sian habangsaMu na di banua ginjang, tu halahi markuaso do Ho.

⁸Ho do, TUHAN na manguhumi angka bangso, uhumi ma au mangihutkon hatigoran jana tulus ni rohangku.

⁹Antak ma hajahatan na sumalin, jana patogu roha ni halak na denggan. Angke Ho do Debata na tigor, didodo Ho do roha dohot pikiran ni jolma.

¹⁰Debata do paronding-ondinganku, halak na denggan roha dijagohon Ia.

¹¹Panguhum na tigor do Debata, sai hona uhumNia do halak na jahat.

¹²Muda parange ni halahi nada muba, madung singkop Debata dohot sinjata na mambaen pusa. Digarut Ia podangNa, disintak siorNa ditembakkon dohot pana na marapi.

¹⁴Ligi, halak na jahat mambaen hajahatan; rohana gok na busuk dohot panipuan.

¹⁵Dihuar ia lubang di halak na asing, hape ia sandiri madabu tu bagasan.

¹⁶Hajahatan na nitahi ni rohana, tapi ia sandiri do na hona dibaensa.

¹⁷Giot mandok tarimakasi au tu TUHAN, jana mamuji goar ni TUHAN Na Gumincat.