Read Batak Angkola MASMUR 71 Bible Online

MASMUR 71 - Batak Angkola bible

MASMUR 71

¹Marsiholip tu Ho do au, ale TUHAN, ulang padiar au dipaila.

²Dibaen na tigor do Ho, palua ma au, sai tangihon jana palua ma au.

³Sai Ho ma parlindungan na sonang di au dohot partahanan na togu; tu Ho do au marlindung dohot martahan, jadi gabe horas torkis ma au.

⁴Ale Debatangku, palua ma au sian halak na jahat, sian kuaso ni halak na kejam dohot na so hasaya.

⁵Ale Tuhan, hum Ho noma arop ni rohangku, tu Ho sajo do au porsaya mamungka sian haposoonku ale DEBATA.

⁶Sian hasosorangku, marpangunsandean tu Ho do au; dijagohon Ho do mamungka sian bortian ni dainang au; jadi sai tongtong ma Ho pujionku.

⁷Gabe tiruan na denggan do ngolungku di halak na bahat, angke Ho do antong pangondianku na gogo.

⁸Sai Ho do tongtong hupuji hupaboa-boa do hagodanganMu ganop ari.

⁹Ulang ma ambungkon au di ari ni hatotobangku ulang tadingkon au muda dung abis gogongku,

¹⁰dibaen martahi do angka musungku salaho tu au, marsaroha do angka halak na sai giot mamunu au.

¹¹Didok halahi, “Madung ditadingkon Debata ia; beta ma takojar jana tatangkup ia, angke nada adong be na paluahonsa.”

¹²Ulang Ho mandao sian au, ale Debata, Debatangku, manigor urupi ma au.

¹³Sai ditaluhon jana diagohon ma, sanga ise na mamorangi iba. Sai dipalebak jana targora ma sanga ise na mambaen hamamago tu iba.

¹⁴Tapi anggo au, sai marpos ni roha tu Ho do au jana jumotjot ma au mamuji goarMu.

¹⁵Ganop ari caritohononku ma hadenggananMu, dohot haluaan na sian Ho na so hasuhatan.

¹⁶Hupuji do angka pambaenanMu na godang i, ale Tuhan DEBATA, hum hadenggananMu sajo do giot baritahononku, hum denggan ni rohaMu sajo.

¹⁷Diajari Ho do au ale Debata, mamungka sian haposoonku, lopus sadarion hupajojor do pambaenanMu na pahomang roha.

¹⁸Lopus matobang au tehe jana ubanon, ale Debata, ulang ma au tadingkon, lopus hubaritahon kuaso dohot godang ni sahalaMu, tu sude pomparan na giot ro.

¹⁹Sagincat ni langit hatigoranMu, ale Debata; na godang do karejo ni tanganMu, ise ma he na tarpatudos tu Ho?

²⁰Madung dipadondonkon Ho tu au bahat sitaonon na dokdok, hape dipasuang Ho do gogongku, jana disungguli Ho au sian tanoman.

²¹Giot baenonMu dope au mur marsangap, jana diapoi Ho au mulak.

²²Pujionku ma Ho marhite hasapi, ale Debatangku, hupuji Ho, dibaen sai denggan rohaMu mida au. Mardongan sora ni hasapi endehononku ma pujian di Ho, ale Na Badia ni Israel.

²³Marsurak-surak ma au mardongan gok jop ni roha, di na mangendehon puji-pujian au di Ho. Marmoga-moga do pamatang dohot tondingku marendei, hara ni na dung nipaluaMu au.

²⁴Sasadari giot hubaritahon do hatigoranMu, angke angka halak na giot manyusahon au, madung ditaluhon jana dipaili. jana talu musungku na mangago au.