Read Batak Angkola MASMUR 76 Bible Online

MASMUR 76 - Batak Angkola bible

MASMUR 76

¹Tu na manguluhon ende. Mardongan sora ni hasapi. Masmur ni si Asap. Ende. Tarbonggal do Debata di Juda di Israel tarbarita do goarNia.

²Jerusalem do ingananNia; Dolok Sion do inganan parmiananNia.

³Disi do disego-sego Ia sude parkokas ni porang, nada adong be pana na marsilo, parince dohot podang.

⁴Sumangap jana marmuliaan do Ho, sian angka dolok na adong sian narobi.

⁵Madung dirampasi Ho angka halak na barani, tarsinok be halahi jana nada tarsunggul be i. Angka tentara na barani madung mago gogona i.

⁶Ale Debata ni si Jakob, Ho do manyonggak halahi, gabe marmatean ma sude na manengget dohot kudona i.

⁷Sude do halak mabiar be mida Ho, muda pola marsijongjong murukMu, ise ma he na tahan?

⁸Dipatubegehon Ho sian langit haputusanMu; mangkohom noma portibi on jana heput,

⁹di hatiha na jongjong Ho giot manguhumi laho paluahon halak na hona sosak di portibi.

¹⁰Rimas ni jolma gabe pujian do i di Ho jana na debanari i gabe hauntunganMu dipake Ho.

¹¹Gohi ma janjimu tu TUHAN Debatamu. Denggan ma i sude bangso na maringanan di na donok maroban silua di Debata sihabiaran i.

¹²Ditipulkon Ia do hagiot ni angka parkuaso, mabiar do angka raja maradopkon Ia.