Read Batak Angkola MASMUR 78 Bible Online

MASMUR 78 - Batak Angkola bible

MASMUR 78

¹Ende pangajaran ni si Asap. Tangihon ma pangajaranku, o hamu bangsongku, parrohahon ma angka hatangku.

²Giot dokkononku ma pandohan dohot umpama, patorangonku ma torkan-torkanan sian narobi.

³Angka pangalaho na hita bege dohot na hita jagit, na niturihon ni angka ompunta sijolo-jolo tubu.

⁴Nada i giot bunihononta sian angka dakdanakta, tapi pajojoronta do i tu sundut na mangihut taringot tu kuaso ni TUHAN dohot karejoNa na pahomang roha, dohot angka pambaenanNia na so tartangkup roha.

⁵Dilehen Ia do tu Israel angka aturanNia, dohot tu pomparan ni si Jakob parentaNa. Disuru Ia angka ompu na umpompar hita mangajarkonsa tu angka dakdanakna,

⁶anso sundut na mangihut manandasa, lalu paudutkonsa tu angka dakdanakna.

⁷Jadi laing dohot muse ma halahi mambaen Debata gabe arop ni rohana, nada lupa di angka pambaenanNia, tapi gabe burju mangoloi parentaNia.

⁸Anso ulang halahi songon ompuna, na sai mangalo jana manggaga. Sai na ganggu do haporsayaan ni sundut ni halahi nada setia tu Debata halahi.

⁹Marsinjatahon pana dohot sior do Marga Efraim, maporus dompak marporang.

¹⁰Dilaosi halahi do parjanjian ni Debata dohot halahi, jana aturanNa nada dioloi.

¹¹Dihalupahon halahi do angka pambaenanNia, angka pangalaho na so haastuan roha na nipatangkasNia tu halahi.

¹²Di jolo ni angka ompu ni halahi, dibaen Debata hahomangan di Luat Mesir, di napa Zoan.

¹³Dibola Ia laut i, jana dipataripar Ia halahi; ditembok Ia aek i, songon tembok.

¹⁴Muda arian diiring Ia halahi marhite ombun, salolot borngin marhite api na marsijongjong.

¹⁵Dibola Ia batu di padang halongonan, dilehen Ia halahi minum songon bahat ni aek di lautan.

¹⁶Disuru Ia dolok batu paruarkon aek, gabe mardalan ma aek i songon batang aek.

¹⁷Hape marpupu do mardosa halahi maradopkon Ia, di parhorsihan i mangalo do halahi tu Na Gumincat i.

¹⁸Sangajo do halahi manguji Debata, di na mangido sipanganon por ni rohana.

¹⁹Dialo halahi do Debata di na nidok ni halahi, “Margogo ma he lakna Debata mangalehen mangan hita di parhorsihan on?

²⁰Tutu do nian dipotuk Ia batu na koras, gabe mardalan aek na doras. Tapi margogo ma he Ia pasingkop roti dohot mangalehen juhut dison tu bangso i?”

²¹Umbege i, disaroso TUHAN ma bangsoNa dohot api, mur gilap ma murukNia tu halahi,

²²dibaen nada porsaya halahi tuSia, di kuasoNia na tuk paluahonsa.

²³Haru songon i pe, diparentahon Ia do langit laho mambuka angka pintuna.

²⁴Dipaijur Ia roti sian banua ginjang, i ma manna di halahi na gabe sipanganon.

²⁵Dilehen do di halahi panganon surusuruan, gabe mangan ma halahi maradu butongan.

²⁶Disuru Ia mangombus alogo Habincaran, hara ni kuasoNia gabe mangombus do alogo Selatan.

²⁷Dipaijur Ia angka unggas di bangsoNa, maradu bahatna songon horsik nada habilangan.

²⁸Dipardabuhon Ia ma angka unggas i di tonga-tonga ni parbandaran humaliang inganan ni halahi maringanan.

²⁹Jadi mangan be ma halahi marbutongan, dibaen na dung dilehen Ia di halahi na nihagiotanna.

³⁰Hape nada marnapuas dope hagiot ni halahi, jadi dompak na mangan halahi,

³¹muruk ma Debata jana dialo ma halahi; dibunu Ia ma halak Israel na poso jana na barani.

³²Haru pe songon i, laing mardosai do bangsoNa angka hahomangan na nibaenNia i, nada mambaen halahi pauba rohana jana porsaya.

³³Hara ni i gabe dipaujung Ia ma ngolu ni halahi, songon sangombus hosa, manigor lintop ma halahi.

³⁴Ganop dibunu Ia sanga na piga halak sian halahi, manyosal ma na asing i jana marsitutu tuSia mangulahi.

³⁵Diingot halahi ma, Debata do pangondian di halahi jana Debata Na Gumincat i do na palua halahi.

³⁶Hape hum gabus sajo do dipandok halahi, nada adong na tutu hata na nidokna i.

³⁷Nada burju halahi tuSia jana nada marsitiopan tu janjiNia.

³⁸Hape dihasiani jana diampuni Ia do bangsoNia i jana nada dipatimpas Ia halahi. Marpupu do diorom Ia murukNia, jana nada dipagurgur Ia rimasNia.

³⁹Diingot Ia do halahi hum parsantongkinan do, songon alogo na ro jana kehe sajo.

⁴⁰Jotjotna i antong halahi mangalo tuSia, pahancit rohaNia di padang halongonan.

⁴¹Sai diuji do marpupu Debata, pasusahon Debata ni Israel, Na Badia.

⁴²Nada diingot halahi kuasoNia, lupa halahi di ari na nipalua sian musuna,

⁴³di na nibaenNia angka hahomangan dompak di Mesir, dohot angka na ganjil-ganjil di padang Zoan.

⁴⁴Dipauba angka batang aek ni halahi gabe mudar, gabe nada tarinum halahi aekna.

⁴⁵Diparhanciti Ia halahi marhite lanok na bahat, jana dipadiar Ia halahi diabisi tohuk.

⁴⁶Diparo Ia angka siapor, na pasudehon suan-suanan dohot na pasego ladang.

⁴⁷Disegohon Ia kobun anggur ni halahi dohot ambolas, songon i angka bona ni ara ni halahi dohot ombun na himpal.

⁴⁸Dipadiar Ia ambolas mandondoni pahan-pahanan ni halahi, dohot porkas manyoro angka binatang ni halahi.

⁴⁹Saluhutan surusuruan parohon bala! RimasNia na jorbut mambaen halahi putus asa.

⁵⁰Dipadiar Ia murukNia manggilap jana dipangabis halahi marhite nyae na mangalangkoti.

⁵¹Sian sude ripe ni halak Mesir, dibunu Ia anak siangkaan halaklahi.

⁵²Jadi diuluhon Ia ma bangsoNia songon habanan ni biri-biri, mangiring halahi mamolus padang halongonan i.

⁵³Sonang jana nada mabiar halahi di panoguNia tapi didondoni hamatean do anggo musuna.

⁵⁴Jadi dioban Ia ma bangsoNia tu tanoNa na badia tu pardolohan na nirampasNia.

⁵⁵Di jolo ni bangsoNia i dipaorot Ia halak na disi humani lalu dibagi-bagihon Ia luat i tu sude marga ni Israel, bangsoNia i, lopus taringani halahi undung-undung ni musu ni halahi.

⁵⁶Hape mangalo ma bangsoNa i jana diuji ma Debata Na Gumincat i, angka parentaNa nada be dioloi halahi.

⁵⁷Marbalik do halahi songon ompuna songon sior na bengkok do halahi nada haposan.

⁵⁸Marhite angka patung dohot inganan parsombaan ni gana-ganaan, mangiburu jana tarrimas Ia dibaensa.

⁵⁹Sun ma muruk ni Debata paida-ida pangalaho ni bangsoNa i, gabe ditulak ma halahi balging.

⁶⁰Undung-undungNia na di Silo[5] ditadingkon Ia, i ma inganan parmiananNia di tonga-tonganta.

⁶¹Dipadiar Ia songon i Poti ParjanjianNia i ditaban, gombaran ni kuaso dohot hasangapanNia dirampas musuna.

⁶²Dimuruki Ia bangsoNia, i ma tean-teananNa jana dipadiar Ia halahi dibunu musuna.

⁶³Dipapangani api angka doli-doli ni halahi, gabe nada adong be mambuat angka bujing-bujing disi.

⁶⁴Jorbut do dibaen mamunu angka malimna, nada tarbaen tangis, angka na mabaluna i.

⁶⁵Ngot ma Tuhan songon na tarsunggul modom, songon halak na gogo dung abis minum anggur.

⁶⁶Disosak Ia alo i mulak balging, salolot na noma halahi talu.

⁶⁷Ditulak Ia pomparan ni si Josep, nada dipuldit Ia Marga Efraim.

⁶⁸Marga Juda do na nipulditNia, dohot Dolok Sion na nihasianNia.

⁶⁹Dipajongjong Ia inganan na badia na sagincat ni langit, jana satohong ni tano, nada tarhutur salolot-lolotna.

⁷⁰Dipili Ia naposoNia si Daud dibuatkon Ia sian padang na marruput.

⁷¹Dipiohon do ia sian parmahanan biri-birinia, laho marmahani Israel bangsoNia.

⁷²Bulus do roha ni halahi antong dipimpin ia, marhite tangan na malo halahi, diparmudu-mudu ia.