Read Batak Angkola MASMUR 8 Bible Online

MASMUR 8 - Batak Angkola bible

MASMUR 8

¹Tu na manguluhon kor. Mangihutkon logu gitit. Masmur ni si Daud. O TUHAN, Tuhannami, tarbarita do kuasoMu di sude portibi! HagodanganMu lalu do tu banua ginjang di langit,

²diendehon dakdanak dohot na baru sorang. PamarentahonMu nada tarhutur, musu parkosom dibaen Ho gabe hohom.

³Muda hutatap langit na nipauliMi, hupareso bulan dohot bintang na nitompaMi,

⁴ise ma he jolma i, pola diingot Ho ia, ise ma he i pola dipangolu Ho ia?

⁵Giot dos dohot diriMu dibaen Ho jolma, ditukui Ho ia dohot sangap na mulia.

⁶Dilehen Ho disia kuaso maradopkon na nitompaMu, madung dipatunduk Ho tusia sasude na adong.

⁷biri-biri, lombu dohot sude pahan-pahanan, sandok binatang na di padang na bidang;

⁸angka unggas dohot angka ihan, sude na mangolu na maringanan di lautan.

⁹O TUHAN, Tuhannami, tarbarita do kuasoMu di sude portibi!