Read Batak Angkola MASMUR 81 Bible Online

MASMUR 81 - Batak Angkola bible

MASMUR 81

¹Tu na manguluhon ende. Mangihutkon logu: Gitit. Sian si Asap. Marsurak ma hita marolop-olop di Debata, hagogoanta, di Debata ni si Jakob, marsurak ma hita marjop ni roha.

²Palu ma tambor, marende ma tangging piltik ma gambus dohot hasapi na mandonting.

³Ombus ma sarune di ari pestanta, di pesta bulan baru dohot bulan tula.

⁴Harana madung diparentahon Debata ni si Jakob anso didalankon i di Israel.

⁵Dilehen do parenta i tu bangso Israel dompak na mangaroro Debata mangalo Mesir. Hubege do sora na so unjung hian dope hubege na salpu i,

⁶“Madung Hubuat boban sian tangkuhukmu, Hutalduskon do lanjaan ni boban sian abaramu.

⁷Di bagasan hasusaanmu pio-pio do hamu tu Au, gabe ro do Au paluahon hamu. Hualusi pe sian ronggur, inganan partabunianKu, di mata mual Meriba, Huuji hamu.

⁸Tangihon hamu ma sipaingotKu, ale bangsongKu, Israel, sugari na tutu hamu ra manangihon Au!

⁹Ulang be adong di tonga-tongamunu debata na asing, ulang somba hamu debata na leban.

¹⁰Au do da TUHAN Debatamu, na manogu hamu ruar sian Mesir. Dompak na malean hamu, Hulehen do hamu mangan.

¹¹Hape nada ra bangsongKu manangihon hatangKu, nada ra Israel mangoloi tu Au.

¹²Gabe Hupadiar noma halahi papir rohana, jana marsibaen roha-rohana.

¹³Iale tehe, sugari sura ra bangsongKi manangihon hatangKu, sugari ra halahi mangoloi Au,

¹⁴gabe manigor patundukonKu ma musu ni halahi, sude alo ni halahi taluhononKu noma i.

¹⁵TaluhononKu ma sanga ise na magigi mida Au, salolotna noma halahi hona uhumKu.

¹⁶Tapi anggo bangsongKu lehenonKu do mangan gandum pilian, jana pabutongonKu dohot manisan.”