Read Batak Angkola MASMUR 82 Bible Online

MASMUR 82 - Batak Angkola bible

MASMUR 82

¹Masmur ni si Asap. Diuluhon Debata do rapot hadebataon di banua ginjang, lalu dilehen Ia haputusanNia:

²“Sadia lelengnai hamu manguhumi di bagasan hakejamon, jana marpihak hamu tu halak parjahat.

³Ondihon hamu ma na so marama dohot halak na gale, lehen ma hatigoran tu na pogos dohot na malarat.

⁴Palua ma halak na gale dohot na so margeldok, palua ma halahi sian tangan ni halak parjahat.

⁵Nada adong diboto hamu, jana nada diastui hamu, hum hara ni hamu, gabe sego sude aturan ni masarakat.

⁶Hudok do, anggo hamu debata do jana angka anak ni Na Gumincat do hamu.

⁷Tapi mate muse do hamu songon jolma manusia, songon halak na godang, hamu pe laing mago do.”

⁸Ro ma Ho ale Debata, uhumi ma portibi on, angke Ho do nampuna sandok bangso.