Read Batak Angkola MASMUR 84 Bible Online

MASMUR 84 - Batak Angkola bible

MASMUR 84

¹Tu na manguluhon ende. Mangihutkon logu: Gitit. Masmur ni horong ni si Korah. Sai di hagioti do inganan parmiananMu ale TUHAN Na Markuaso.

²Sai na malungun situtu do rohangku mida ingananMu; sai marsurak do pamatang dohot tondingku pio-pio tu Debata na mangolu.

³Salang amporik adong do asarna songon i muse unggas layang-layang. Dipayakkon halahi anakna di lambung ni langgatanMu, ale TUHAN Na Markuaso, Rajangku jana Debatangku.

⁴Na martua do halak na tinggal di BagasMu, jana na sai mangendehon pujian di goarMu.

⁵Martua ma halak na dapotan gogo sian Ho, jana na dihalungunkon rohana jiara tu Dolok Sion.

⁶Di na mardalan halahi mamolus Rura Baka na harsang i, mijur ma udan na parjolo songon pasupasu gabe gok ma di tano i mual dohot ambar.

⁷Gogo ni halahi mur martamba, dompak na mardalan tu Sion laho mangadop tu Debata.

⁸Ale TUHAN Na Markuaso, tangihon ma tangiangku ale Debata ni si Jakob, parrohahon ma pio-piongku.

⁹Ligi ma parincenami, ale Debata, ligi ma bohi ni na nitodoMu sandiri.

¹⁰Dumenggan do sadari di BagasMu, ulang pado saribu ari di inganan na asing. Dumenggan do jongjong di horbangan ni Bagas Ni Debatangku, ulang pado tinggal di bagas ni halak na jahat.

¹¹Angke pangondian na gogo do TUHAN Debata, na mangalehen sangap dohot basa-basa di hita. Sai marpupu do dilehen Ia hadenggananNia tu halak na patuluskon hagiotNia.

¹²Ale TUHAN Na Markuaso, sai martua ma tutu sanga ise na porsaya tu Ho.