Read Batak Angkola MASMUR 86 Bible Online

MASMUR 86 - Batak Angkola bible

MASMUR 86

¹Tangiang ni si Daud Tangihon ma tangiangku ale TUHAN, alusi ma au, dibaen pogos jana gale do au.

²Jagohon ma ngolungku, dibaen holong do rohaMu di au, palua ma naposoMon na manghaporsayai Ho.

³Martangiang au sasadari tu Ho, Debatangku do Ho, ibo ma rohaMu di au.

⁴O Tuhan, pajop ma roha ni naposoMu, tu Ho do huadopkon tangiangku.

⁵Angke na burju do Ho ale Tuhan, jana sai mangampuni do Ho sanga ise na martangiang tu Ho sai dihaholongi Ho do.

⁶Parrohahon ma tangiangku ale TUHAN, tangihon ma angguk-anggukku mangido partolongan.

⁷Muda susa au, martangiang au tu Ho dibaen dialusi Ho do au.

⁸Ale TUHAN, nada adong debata na songon Ho, nada adong pambaenanna na tudos tu Ho.

⁹Ale Tuhan, giot marroan sandok bangso na nijadihonMu, laho marsomba Ho jana mamuji hagodanganMu.

¹⁰Dibaen na sangap do Ho, hahomangan do karejoMu, hum Ho do Debata.

¹¹Ajarkon ma tu au hagiotMu ale TUHAN, anso huihutkon i marhaburjuan. Ajari ma au marpangoloion tu Ho sian sandok rohangku.

¹²Giot martarimakasi do rohangku tu Ho, sian sandok rohangku. Ale Tuhan Debatangku, salolot-lolotna hupuji ma goarMu.

¹³Hara ni godangna holong ni rohaMu na manongtong i di au, madung dipalua Ho au sian liang ni kuburan.

¹⁴Ale Debata, jongjong do halak siginjang roha mangalo au, sapunguan halak na kejam giot mamunu au; nada parduli halahi tu Ho.

¹⁵Tapi anggo Ho, ale Tuhan, Debata parholong do Ho jana pardenggan basa. Holong ni rohaMu na manongtong i maradu marlobian parsobar do Ho jana tongtong haposan.

¹⁶Parrohahon jana hasiani ma au, lehen ma hagogoonMu tu naposoMon, jana palua ma dakdanak halaklahi ni naposoMu dadaboru.

¹⁷Patangkas ma hadenggananMu tu au, anso maila sanga ise na magigi mida au, muda diida halahi bahaso, Ho ale TUHAN, madung mangurupi dohot mangapoi au.