Read Batak Angkola MASMUR 88 Bible Online

MASMUR 88 - Batak Angkola bible

MASMUR 88

¹Ende, Masmur ni si Korah. Tu na manguluhon ende. Mangihutkon logu: Mahalat-Leanot. Ende pangajaran ni si Heman, halak Esrahi. Ale TUHAN Debata sipalua au, sasadari pio-pio do au tu Ho; jana bornginna i ro do au tu adopanMi.

²Sai lalu ma nian tu Ho tangiangku sai tangihon ma pio-piongku.

³Bahat do hasusaan na dondon tu au hamatean madung sihir di jolo ni pintu.

⁴Sai songon halak na giot mate noma au na so adong be gogona.

⁵Di tonga-tonga ni halak na mate au ditadingkon songon halak na hona bunu bustang di bagasan kuburan, songon halak na dung dihalupahon, halak na so dapot tolongan be sian Ho.

⁶Didanggurkon Ho au tu lubang na bagas, tu liang ni kuburan na bagas boti manggolap.

⁷Didondoni rimasMu au santak boratna, maropuk ma da au baenon ni pangamuk ni murukMu.

⁸Dipadao Ho angka sitandaanku sian au dibaen Ho au di halahi gabe sihagigian, dihobuk au nada tarbaen luncat.

⁹Rambon matangku hara ni na marsitaonon ganop ari au pio-pio tu Ho, ale TUHAN jana martangiang pahirtang tangan.

¹⁰Dibaen Ho do lakna hahomangan tu halak na mate? Tarbaen dope lakna jongjong halahi jana mamuji Ho mangulahi?

¹¹Adong he na pajojor holong ni rohaMu di tanoman, dohot hadenggananMu di inganan hamagoan?

¹²Adong ma he na marnida hahomangan na nibaenMi, di hagolapan, sanga hadenggananMi di luat ni halak na di halupahon?

¹³Tolong ale TUHAN, tu Ho do au pio-pio, ganop manyogot sai martangiang au tu Ho.

¹⁴Ale TUHAN, biasi ditulak Ho au jana dipapeol Ho bohimu sian au?

¹⁵Sian na menek do au marhancit jana dirohai hamatean, abis gogo do au manaonkon uhumanMu.

¹⁶Magopu au patunda ni parpiar ni murukMu, abis au hara ni jorbut ni panyarosoMu.

¹⁷Songon aek magodang rongom halahi tu au, sasadari dihobuk halahi do au sian sude panjuru.

¹⁸Dipadao Ho sian au angka ale-ale dohot donganku, hum hagolapan ma na tading mandongani au.