Read Batak Angkola MASMUR 89 Bible Online

MASMUR 89 - Batak Angkola bible

MASMUR 89

¹Ende pangajaran ni si Etan, halak Esrahi. Ale TUHAN, sai marende do au tongtong salaho tu holong ni rohaMu na manongtong. Baritahononku ma holong ni rohaMu tu ganop sundut.

²Dibaen manongtong do holong ni rohaMu songon langit, hot do habonaranMu.

³Ningmu do, “Madung Hupudun janji dohot halak na Hupili, madung marsumpa Au tu si Daud, naposongKi:

⁴‘Habangsamu hot do dijuguhi pomparanmu sandiri.’ ”

⁵Ale TUHAN, dipuji na marlagut di banua ginjang i do karejoMu na godang i, hasetiaonMu diendehon angka pardibanua ginjang.

⁶Di langit ni langitan nada adong na tudos dohot Ho, TUHAN, nada adong pardibanua ginjang na sarupa dohot TUHAN.

⁷Dipasangap angka pardibanua ginjang do Ho, jana dihabiari sian sude na adong humaliang Ho.

⁸Ale TUHAN, Debata Na Markuaso, ise dehe songon Ho? Na gogo do Ho ale TUHAN, jana hasetiaanMu adong di humaliangMu.

⁹Dirajai Ho do laut na sai gumaluncang dipademak Ho do panggasa-gasa ni galumbang.

¹⁰Rahab[6] naga laut i dibunu jana diropukkon Ho, ditaluhon Ho musumu marhite tangan na gogo.

¹¹Langit dohot portibi Ho do nampuna i, tano dohot isina sude na nitompaMu do i.

¹²Ho do na manjadihon Utara dohot Selatan, Dolok Tabor dohot Hermon marsurak di Ho marhamogaan.

¹³Na lobi godang do antong kuasoMu, jana na sumurung do hagogoonMu!

¹⁴Hatigoran dohot hajujuron do ojahan ni harajaanMu, torang do huida holong dohot habonaron di sude na nibaenMu.

¹⁵Martua ma bangso na marsomba mardongan ende, sondangon ni hadenggananMu ma ngolu ni halahi, ale TUHAN.

¹⁶Hara ni Ho, gabe marjop ni roha halahi, dipuji halahi hadenggananMu sasadari.

¹⁷Dilehen Ho do hamonangan na tarlobi di hami, hara ni hadenggananMu ma umbaen na monang hami.

¹⁸Angke madung dipili Ho ale TUHAN pangondiannami, ale na badia ni Israel, madung diangkat Ho rajanami.

¹⁹Narobi di bagasan sada parnidaan, didok Ho tu naposoMu na setia, “Madung Huurupi sada halak na tongam, madung Hupatimbo sada halak sian tonga-tonga ni na bahat.

²⁰Madung Hupadumpangkon si Daud, naposongKu, Hupabangkit ia marhite miakKu.

²¹Sai tongtong do ia ondihonon ni hagogoonKu sai pargogoan ni kuasongKu do ia.

²²Nada lobas musuna manaluhon ia, nada tartaluhon halak na jahat ia.

²³PasidungonKu ma sude musunia, Hubunu sanga ise na mangkosomi ia.

²⁴Bonar do Au tongtong jana hot manghaholongi ia, jana Hulehen hamonangan tusia.

²⁵PabidangonKu ma harajaannia, sian Laut Tonga lopus tu Batang aek Efrat bidang ni luatnia.

²⁶Dokkononnia ma tu au, ‘Ho do Damang jana Debatangku, Ho do pangondianku dohot sipalua au.’

²⁷Hubaen ia gabe anakKu siangkaan, sian sandok raja, ia ma na gumodang.

²⁸Holong ni rohangKu nada mansadi, parjanjianKu dohot ia sai hot do i Hugohi.

²⁹Salolot adong langit di ginjang tano martahan do habangsania, jana pomparanna sandiri manjuguhisa.

³⁰Tapi muda dilaosi pomparannia uhumKu, jana nada mardalan marguru di parentangKu,

³¹muda nada diterge halahi haputusanKu jana dipasiding paraturanKu,

³²gabe uhumanKu do halahi hara ni pangalaosionna i, jana Hupamasa parkancitan hara ni dosana i.

³³Tapi anggo si Daud hot do holong ni rohangKu tusi, janjingKu na tusia sai na patulusonKu do i.

³⁴Nada oseonKu parjanjianKu dohot ia, sian janjingKi, sada pe nada butaonKu mangulahi.

³⁵Sanoli do Au marsumpa mangasahon goarKu na badia; nada margabus Au tu si Daud.

³⁶Martahan do habangsania salolot marsinondang mataniari, jana pomparannia sandiri manjuguki.

³⁷Tohong do harajaannia salolot-lolotna songon bulan, saksi na bonar di awang-awang.”

³⁸Hape saonnari ale Tuhan, muruk Ho tu raja i, halak na nitodoMu dibuang jana ditadingkon Ho i.

³⁹Sundat dibaen Ho parjanjianMu dohot naposoMu, diambungkon Ho tukuna i tu bagasan bustak.

⁴⁰Dirumpakkon Ho angka tembok ni kotana, magargar dibaen Ho angka bentengna.

⁴¹Sude halak pamolus marsirampas di nampunania, gabe siincak-incakan ni hombarna noma ia.

⁴²Dilehen Ho hamonangan tu musuna, dipajop Ho roha ni halahi sudena.

⁴³Maleu dibaen Ho sinjatania, dipadiar Ho talu di porang ia.

⁴⁴Dibuat Ho kuasonia songon raja, disampakkon Ho tu tano tukunia.

⁴⁵Dipapendek Ho hatiha ni haposoonnia, jana di gupgupi Ho ia dohot hailaan.

⁴⁶O TUHAN sadia honok nari Ho martabuni? Intap ni andigan murukMu marsigorgor songon api?

⁴⁷Ingot ma pendek ni umurnami, songon mahluk parsantongkinan do ditompa Ho hami.

⁴⁸Ise ma tarbaen torus mangolu so pola mate? Ise tarbaen malua sian kuburan?

⁴⁹Ale Tuhan di dia do holong ni rohaMu na parjolo i, na nijanjihonMu tu si Daud mardongan sumpa i?

⁵⁰Ingot ma sanga songon dia au, naposoMon martilako, jana manaon incak ni angka bangso.

⁵¹Dilayasi musuMu do ale TUHAN, raja na nipulditMi, sanga tu dia pe ia kehe, hona incak ni halahi.

⁵²Puji ma TUHAN ro di salolot-lolotna. Tulus ma songon i! Amen!